ނ. ހެނބަދޫގައި ފުލުހެއްގެ ސައިކަލުގައި ރޯކޮށްލައިފިއެވެ.
ފުލުހުންގެ ތަރުޖަމާން އަދި އެސިސްޓެންޓް ކޮމިޝަނާ އޮފް ޕޮލިސް އަހްމަދު ޝިފާން ވިދާޅުވީ ނ. ހެނބަދޫގައި ފުލުހެއްގެ ސައިކަލަށް އޮގަސްޓު 1 ވަނަ ދުވަހު ގެއްލުންދީ އަދި އިތުރު ފުލުހެއްގެ ސައިކަލުގައި ރޭ ދަންވަރު ރޯކޮށްލާފައިވާ ކަމަށެވެ.
މިކަމަކީ ނޫނު އަތޮޅުގައި ފުލުހުން ހިންގަމުންދާ މަސްތުވާތަކެތީގެ އޮޕަރޭޝަނަކާއި ދެކޮޅަށް އެކަމުގައި ތުހުމަތު ކުރެވޭ ބަޔަކު ކޮށްފައިވާ ކަމެއްކަމަށް ތުހުމަތު ކުރެވޭ ކަމަށް ޝިފާން ވިދާޅުވިއެވެ.
އެއީ ވަރަށް ފިނޑި އަމަލެއްގެ ގޮތުގައި ސިފަ ކުރައްވާ ޝިފާން އިތުރަށް ވިދާޅުވީ އެކަހަލަ އަމަލެއްގެ ސަބަބުން ފުލުހުންގެ ހިތްވަރަށް ކުޑަވެސް ބަދަލެއް ނާންނާނެ ކަމަށެވެ.
"މިފަދަ ފިނޑި އަމަލެއްގެ ސަބަބުން ފުލުހުންގެ ހިތްވަރާއި ސާބިތުކަމަށް ކުޑަވެސް ބަދަލެއް ނާންނާނެ ކަން މިފަދަ ވިސްނުމުގައި އަމަލުކުރަމުންދާ ފަރާތްތަކަށް ހަނދާންކޮށްދެން." ޝިފާން ވިދާޅުވިއެވެ.
މަސްތުވާތަކެއްޗާއި ދެކޮޅަށް ފުލުހުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އެކި އެކި އޮޕަރޭޝަންތައް ހިންގާ، ގިނަ އަދަދެއްގެ މަސްތުވާތަކެތި ދާދިފަހުން ވެސް ވަނީ އަތުލައިގަނެފައެވެ.
