ރާއްޖެއަށް ފަތުރުވެރިއެއްގެ ގޮތުގައި އައިސް ގަވައިދާ ހިލާފަށް މަސައްކަތް ކުރަމުން ދިޔަ ނޯވޭ މީހަކު ޑީޕޯޓް ކޮށްލައިފިއެވެ.
ބިދޭސީންގެ މައްސަލަތައް ހައްލު ކުރުމުގެ ތެރެއިން ގަވައިދާ ހިލާފަށް ރާއްޖޭގައި މަސައްކަތް ކުރާ ބިދޭސީން އަތުލައިގަތުމުގެ މަސައްކަތުގައި އިސްކޮށް އުޅޭ އިމިގްރޭޝަނުން ބުނީ، ނޯވޭ ފިރިހެނަކު މިދިޔަ އަހަރުގެ ޑިސެމްބަރު މަހުގެ 20 ވަނަ ދުވަހު ރާއްޖެ އެތެރެވެފައިވަނީ ފަތުރުވެރިއެއްގެ ގޮތުގައި ކަމަށެވެ.
އޭނާގެ ވިސާގެ މުއްދަތު ހަމަވުމުން ވެސް އަނބުރާ ގައުމަށް ނުގޮސް ރާއްޖޭގައި މަސައްކަތްކޮށް ދިރިއުޅެމުންދާ މައްސަލައެއް ހުށަަހޅާފައިވާ ކަމަށް އިމިގްރޭޝަނުން ބުނެއެވެ. އެގޮތުން ފުލުހުންގެ ހިދުމަތުގެ އެހީތެރިކަމާ އެކު އެމީހާ ވަނީ މިދިޔަ ޖުލައި މަހުގެ 25 ވަނަ ދުވަހު އިމިގްރޭޝަން ބެލުމުގެ ދަށަށް ގެނެސްފައި ކަމަށް ބުނެއެވެ.
އަދި އިމިގްރޭޝަންގެ ގާނޫނާ ހިލާފުވެފައި ވާތީ އޭނާ ވަނީ މިހާރު ޑީޕޯޓު ކޮށްފައި ކަމަށް ވެސް އިމިގްރޭޝަނުން ބުނެއެވެ.
މި ސަރުކާރުން އަންނަނީ ރާއްޖޭގައި ގަވައިދާ ހިލާފަށް އުޅޭ ބިދޭސީން ހޯދައި، ބިދޭސީންގެ މައްސަލަ ހައްލު ކުރުމަށް ހާއްސަ އޮޕަރޭޝަނެއް ފަށާފައެވެ. އެ ގޮތުން މިފަދަ ބިދޭސީ މީހުންގެ ތެރޭގައި ސައްހަ ވިސާ ނެތި އުޅޭ މީހުން ހޯދައި އެމީހުން ހިންގާ ވިޔަފާރިތައް ބަންދުކޮށް އަދި އެފަދަ މީހުން އަންނަނީ ޑީޕޯޓް ކުރަމުންނެވެ.
