ހުޅުމާލޭގެ ވިނަރެސް ފްލެޓް ކައިރީ އިއްޔެ ހިނގި އެކްސިޑެންޓުގައި އަނިޔާވި މީހާގެ ކަނދުރާ އަދި މައިބަދައިގައި ވެސް ރެނދުލާފައިވާ ކަމަށް ފުލުހުން ބުނެފިއެވެ.
ހުޅުމާލޭ ފޭސް 2 ވިނަރެސް ފްލެޓް ކައިރީގައި ކާރަކާއި ސައިކަލެއް ޖެހި އިއްޔެ ހިނގި އެކްސިޑެންޓަކީ ބާރު ސްޕީޑުގައި ކާރު ދުއްވާފައި ދިޔުމުން ހިނގި އެކްސިޑެންޓެއް ކަމަށް ފުލުހުން ބުނެފައި ވެއެވެ. ކާރު ކޮންޓްރޯލުން ނައްޓައިގެން ގޮސް ޕާކްކޮށްފައި ހުރި ސައިކަލެއްގެ މަތީގައި އިން މީހެއްގެ ގައިގައި ޖެހި އެ މީހާ އެ ވަގުތު ވިއްސައިގެންދާ މަންޒަރު އާންމުވި، ސީސީޓީވީ ފުޓޭޖްތަކުން ފެނެއެވެ.
އެކްސިޑެންޓުވި ކާރުގައި ތިބި މީހުންގެ ބަންދުގެ މުއްދަތު ޖެހުމަށް ކްރިމިނަލް ކޯޓަށް ހާޒިރުކުރުމުން ފުލުހުން ވަނީ އެކްސިޑެންޓްއަށްފަހު ކަންހިނގާ ދިޔަ ގޮތް ކިޔާދީފައެވެ.
ފުލުހުން ބުނީ އަނިޔާ ލިބުނު ފަރާތުން އެކްސިޑެންޓްވެ ގޮސް ފުރަތަމަ ޖެހުނީ ކަނދުރާ ކަމަށެވެ. އަދި ކަނދުރާގައި ރެނދުލާފައި ހުރި ކަމަށާއި، ބެކްބޯންގައި ވެސް ރެނދުލާފައިވާ ކަމަށް ފުލުހުން ވަނީ ބުނެފައެވެ. މީގެއިތުރުން އެ މީހާގެ ބޯ ފަޅައިގެން ގޮސްފައިވާ ކަމަށާއި އޭނާގެ ހާލަތު ސީރިއަސް ކަމަށް ވެސް ފުލުހުން ވަނީ ބުނެފައެވެ.
މި އެކްސިޑެންޓްގައި ހިމެނޭ ކާރުގައި ތިބި 3 މީހުން ބަންދުކުރުމަށް ކްރިމިނަލްކޯޓުން ހުކުމްކޮށްފައި ވާއިރު އެމީހުން ވަނީ ބަންދަށް ލުއި ދިނުމަށް އެދިފައެވެ.
ކްރިމިނަލްކޯޓުން ވަނީ ކާރުދުއްވަން އިން މީހާ ( އިކްރާމުއްރަހްމާން) ޝަރީއަތް ނިމެންދެން ބަންދު ކުރުމަށް ހުކުމްކޮށްފައެވެ. އަދި އިބްރާހިމް އިކްރާމް ޝަރީއަތް ނިމެންދެން ބަންދު ކުރުމަށް އަމުރުކޮށްފައި ވާއިރު، އިސްމާއީލް ޖިނާހުގެ ބަންދަށް ވަނީ 15 ދުވަސް ޖަހާފައެވެ.
