ގާޒާ ކޮންޓްރޯލް ކުރާ ހަމާސް ޖަމާއަތުގެ ސިޔާސީ ގޮފީގެ ވެރިޔާ އިސްމާއިލް ހަނިއްޔާ އަވަހާރަ ކޮށްލުން ދިވެހި ސަރުކާރުން ކުށްވެރި ކޮށްފިއެވެ.
2 ޕެރަގްރާފުގެ ކުރު ބަޔާނުގައި ރާއްޖޭގެ ފޮރިން މިނިސްޓްރީން ބުނީ، ހަނިއްޔާ އީރާނުގައި ހުންނަވަނިކޮށް ބުދަދުވަހު އަވަހާރަ ކޮށްލާފައި ވާ ކަމަށެވެ.
އެބަޔާނުގައި ފޮރިން މިނިސްޓްރީން އިތުރަށް ބުނީ، ހުރިހާ ގައުމުތަކުންވެސް ބައިނަލްއަގުވާނީ ގާނޫނުތަކާއި ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނުތައް ނަގަހައްޓައި ގާޒާގެ ހަމަނުޖެހުމަށް އަވަސް ހައްލެއް ހޯދައި ސަރަހައްދީ ހަމަޖެހުން ޔަގީން ކުރުމަށް އެންމެން ގުޅިގެން މަސައްކަތް ކުރުމަށް ގޮވާލާ ކަމަށެވެ.
މި ބަޔާނުގައި ހަނިއްޔާ އަވާހާރަ ކޮށްލި އިޒްރޭލު ކުށްވެރި ކޮށްފައެއް ނުވެއެވެ.
ރާއްޖެއިން އިޒްރޭލު ކުށްވެރި ނުކުރީ ކޮން ސަބަބަކާ ހުރެކަން ސާފު ނުވާ އިރު، ބައިނަލްއަގުވާމީ ހަބަރުފަތުރާ ފަރާތްތަކުންނާއި އީރާނާއި އަދި ދުނިޔޭގެ ގިނަ ގައުމުތަކުން، އެ އަމަލު ހިންގީ އިޒްރޭލު ކަމަށް ބުނެ، އިޒްރޭލުގެ އެ އުދުވާން ކުށްވެރި ކޮށްފައި ވެއެވެ.
ބައެއް ހަބަރުތަކުން ބުނާގޮތުން އިޒްރޭލުން ހަނިއްޔާ އަވަހާރަ ކޮށްލާފައި ވަނީ، ވަޓްސްއެޕް މެދުވެރިކޮށް ހަނިއްޔާ ހުންނެވި ސީދާ ތަން ދެނެގަނެ، ޑްރޯން ބޭނުންކޮށްގެން ދިން މިސައިލް ހަމަލާއެއްގައެވެ.
ހަނިއްޔާ އަވާހަރަ ކޮށްލި އިރު އޭނާ ހުންނެވީ އީރާނުގެ ރައީސް ހުވާ ކުރައްވާ ރަސްމިއްޔާތަށް ވަޑައިގެން އީރާނުގެ ވެރިރަށް ތެހެރާނުގައެވެ.
