ހުޅުމާލޭގެ ވިނަރެސް ފްލެޓް ކައިރީ މިއަދު ހިނގި ނުރައްކާތެރި އެކްސިޑެންޓްގައި ހިމެނޭ ކާރުގައި ތިބި ތިން މީހުން ވެސް ހައްޔަރު ކޮށްފިއެވެ.

މީގެ ކުރިން ފުލުހުން ބުނެފައި މިއަދު ކޯޓު އަމުރެއްގެ ދަށުން އުމުރުން 25 އަހަރުގެ ދިވެހި ފިރިހެނެއް ހައްޔަރު ކޮށްފައިވާ އިރު، އަދި އުމުރުން 33 އަހަރުގެ ދިވެހި ފިރިހެނަކު ވެސް ހައްޔަރު ކޮށްފައިވާ ކަމަށެވެ. މި މީހާ ވެސް ހައްޔަރު ކޮށްފައި ވަނީ ކޯޓު އަމުރެއްގެ ދަށުން ކަމަށް ފުލުހުން ބުނެފައި ވެއެވެ.

މި އެކްސިޑޭންޓް މައްސަލައާ ގުޅޭ އެންމެ ފަހުގެ މައުލޫމާތު ހިއްސާ ކުރައްވަމުން ހޯމް މިނިސްޓަރު އަލީ އިހްސާން ވިދާޅުވީ، އިއްޔެ މެންދުރު ހިނގި ނުރައްކާތެރި އެކްސިޑެންޓްގައި ހިމެނޭ ކާރުގައި އިން ތިންވަނަ މީހާވެސް ހައްޔަރު ކޮށްފައިވާ ކަަމަށެވެ. އަދި ފުލުހުން ބުނެފައި ވަނީ ތިން މީހުން ހައްޔަރުކޮށް މި މައްސަލައިގެ ތަހުގީގު ފަށާފައިވާ ކަމަށެވެ.

ނަމަވެސް ތިން ވަނަ އަށް ހައްޔަރު ކުރި ފަރާތުގެ އިތުރު މައުލޫމާތެއް ފުލުހުން އަދި ހާމައެއް ނުކުރެއެވެ.

މި އެކްސިޑެންޓުގެ ވީޑިއޯ ސޯޝަލް މީޑިއާގައި ވައިރަލް ވަމުން ދާއިރު، ވީޑިއޯއިން ފެންނަ ގޮތުގައި މަގުމަތީ ދުއްވާފައި ދިޔަ ސައިކަލެއް ވިނަރެސް ކައިރީ މަގުމަތީގައި މަޑުކުރުމަށް ފަހު ސައިކަލް ދުއްވި މީހާއަށް ނުފޭބި އުޅެނިކޮށް ފަހަތުން އައި ކާރު ކޮންޓްރޯލް އިން ނެއްޓި ބާރު ސްޕީޑުގައި ގޮސް ވަނީ ސައިކަލުގައި ޖެހިފައެވެ. އެއާއެކު ސައިކަލުގައި އިން މީހާ ވިއްސައިގެން ގޮސް މާ ދުރަށް ޖެހުނު މަންޒަރު ވީޑިއޯއިން ފެނެއެވެ.

މި އެކްސިޑެންޓް ފުލުހުންނަށް ރިޕޯޓު ކޮށްފައި ވަނީ އިއްޔެގެ މެންދުރުގެ ވަގުތެއްގައެވެ. އަދި އެކްސިޑެންޓުގައި ހިމެނޭ ސައިކަލު ދުންވަން އިން ފިރިހެން މީހާއަށް އަނިޔާވެ ހުޅުމާލޭ ހޮސްޕިޓަލުގައި ފަރުވާ ދިނުމަށް ފަހު ވަނީ އިތުރު ފަރުވާއަށް އައިއޖީއެމްއެޗަށް ބަދަލުކޮށްފައެވެ. އެންމެ ފަހުން ލިބުނު މައުލޫމާތަށް ބަލާއިރު، އެމީހާގެ ހާލު ރަނގަޅު ނޫން ކަމަށް އައިޖީއެމްއެޗުން ވަނީ ބުނެފައެވެ.

ހަބަރު އެކްސިޑެންޓް ޕޮލިސް