ހުޅުމާލޭގެ ވިނަރެސް ފްލެޓް ކައިރީ މިއަދު ހިނގި ނުރައްކާތެރި އެކްސިޑެންޓްގައި ކާރު ދުއްވަން އިން ފިރިހެން މީހާ ހައްޔަރު ކޮށްފި ކަމަށް ފުލުހުން ބުނެފިއެވެ.
ފުލުހުން ބުނީ، އޭނާ ހައްޔަރު ކޮށްފައި ވަނީ ކޯޓު އަމުރެއްގެ ދަށުން ކަމަށާއި އެއީ އުމުރުން 25 އަހަރުގެ ދިވެހި ފިރިހެނެއް ކަމަށެވެ.
މި އެކްސިޑެންޓުގެ ވީޑިއޯ ސޯޝަލް މީޑިއާގައި ވައިރަލް ވަމުން ދާއިރު، ވީޑިއޯއިން ފެންނަ ގޮތުގައި މަގުމަތީ ދުއްވާފައި ދިޔަ ސައިކަލެއް ވިނަރެސް ކައިރީ މަގުމަތީގައި މަޑުކުރުމަށް ފަހު ސައިކަލް ދުއްވި މީހާއަށް ނުފޭބި އުޅެނިކޮށް ފަހަތުން އައި ކާރު ކޮންޓްރޯލް އިން ނެއްޓި ބާރު ސްޕީޑުގައި ގޮސް ވަނީ ސައިކަލުގައި ޖެހިފައެވެ. އެއާއެކު ސައިކަލުގައި އިން މީހާ ވިއްސައިގެން ގޮސް މާ ދުރަށް ޖެހުނު މަންޒަރު ވީޑިއޯއިން ފެނެއެވެ.
މި އެކްސިޑެންޓް ފުލުހުންނަށްރިޕޯޓު ކޮށްފައި ވަނީ މިއަދު މެންދުރުގެ ވަގުތެއްގައެވެ. އަދި އެކްސިޑެންޓުގައި ހިމެނޭ ސައިކަލު ދުންވަން އިން ފިރިހެން މީހާއަށް އަނިޔާވެ ހުޅުމާލޭ ހޮސްޕިޓަލުގައި ފަރުވާ ދިނުމަށް ފަހު ވަނީ އިތުރު ފަރުވާއަށް އައިއޖީއެމްއެޗަށް ބަދަލުކޮށްފައެވެ. އެންމެ ފަހުން ލިބުނު މައުލޫމާތަށް ބަލާއިރު، އެމީހާގެ ހާލު ރަނގަޅު ނޫން ކަމަށް އައިޖީއެމްއެޗުން ވަނީ ބުނެފައެވެ.
