ޓިކްޓޮކް ލައިވެއްގައި ހިނގި ދެބަސްވުމަކާ ގުޅިގެން، ގެއަކަށް ވަދެ ހިންގި ހަމަނުޖެހުމަކަށް ފަހު ދެމީހަކު ހައްޔަރުކޮށްފިއެވެ.
ފުލުހުން ބުނީ، ޓިކްޓޮކް ލައިވްއެއްގައި ހިނގި ދެބަސްވުމެއްގައި މިއަދު ހެނދުނު މާފަންނު ގެއަކަށް ވަދެ ހަމަނުޖެހުން ހިންގަން އުޅުމުގެ ތުހުމަތުގައި ދެމީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
ނަމަވެސް މިހާރު އެ މީހުން ދޫކޮށްލާފައިވާ ކަމަށް ފުލުހުން ބުނެފައި ވެއެވެ.
އެ މީހުން ހައްޔަރުކޮށްގެންދާ މަންޒަރު ވީޑިއޯ ފޭސްބުކްގައި ދައުރުވަމުން ދިޔަ ނަމަވެސް އެކަމާ ގުޅޭ އިތުރު ތަފްސީލެއް ފުލުހުން ހިއްސާކޮށްފައި ނުވެއެވެ. ވީޑިއޯއިން ފެންނަ ގޮތުގައި ހަމަނުޖެހުން ހިންގާފައި ވަނީ ދެ ފިރިހެނުންނެވެ. އަދި އެ ދެ މީހުން ހައްޔަރު ކުރުމަށް ފުލުހުން ހަރަކާތްތެރިވާ މަންޒަރު ފެނެއެވެ.
މީގެ ކުރިންވެސް ޓިކްޓޮކް ލައިވްތަކުގައި ޒުވާބުކޮށް އެކަކު އަނެކަކާ ދިމާއަށް ބޭއަދަބީ ބަސް ބޭނުންކޮށް ޒުވާބުކޮށްފައި ވެއެވެ. އެގޮތުން ދާދިފަހުން ވެސް ވަނީ ޓިކްޓޮކް ލައިވެއްގައި ހިނގި ހަމަނުޖެހުމެއްގައި އަންހެނަކު ގެއަކަށް ވަދެ ޒުވާބުކޮށްފައެވެ. އެކަން ހިނގާފައި ވަނީ ވިލިމާލޭގައެވެ.
