އައްޑޫ ޕޮލިސް އެކަޑަމީގައި ކާނާ ވިހަވެގެން ހާލު ގޯސްވެ އައިސީޔޫގައި ފަރުވާދެމުންދިޔަ 2 ދަރިވަރުންނަށްވެސް މިހާރު ފަރުވާ ދެނީ ވޯޑުގައި ބާއްވައިގެން ކަމަށް ފުލުހުން ބުނެފިއެވެ.
އައިސީޔޫގައި ފަރުވާދެމުންދިޔަ 2 ދަރިވަރުންގެ ތެރެއިން 1 ދަރިވަރަކު، މި މަހުގެ 19 ވަނަ ދުވަހު ވޯޑަށް ބަދަލުކޮށްފައިވާއިރު ފުލުހުން ބުނީ އައިސީޔޫގައި ފަރުވާދެމުން ދިޔަ އަނެއް ދަރިވަރުވެސް މިހާރު ވޯޑަށް ބަދަލުކޮށްފައިވާކަމަށެވެ. އަދި މި ދެ ދަރިވަރުންގެ ހާލުވެސް ރަނގަޅުވަމުން އަންނަކަމަށް ފުލުހުން ވަނީ ބުނެފައެވެ.
ކާނާ ވިހަވުމުގެ ސަބަބުން ޕޮލިސް ކޮލެޖްގައި ތަމްރީނު ހަދަމުން ދިޔަ ދަރިވަރުންގެ ތެރެއިން 32 ވަރަކަށް ވަނީ އައްޑޫ އިކުއިޓޯރިއަލް ހޮސްޕިޓަލްގައި ފަރުވާ ދީފައިވާއިރު މިފަދަ ހާދިސާއެއް ތަކުރާރުވިޔަ ނުދިނުމަށް އަޅަންޖެހޭ ފިޔަވަޅުތައް އަޅާނެ ކަމަށް ފުލުހުން ވަނީ ބުނެފައެވެ.
މި ހާދިސާ ހިނގި ގޮތް ކަމާ ބެހޭ ފަރާތްތަކުން ދަނީ ބަލަމުންނެވެ.
