ހައްޖުވެރިން ބަލާ އެއާޕޯޓަށް ދަތުރުކުރާ ފަރާތްތަކުން ފުލުހުންގެ އިރުޝާދުތަކަށް އަމަލުކުރުމަށް އިލްތިމާސް ކޮށްފިއެވެ.
ފުލުހުން ބުނީ ހައްޖުވެރިން ރާއްޖެ އައުމަށް ހަމަޖެހިފައިވާ ދުވަސްތަކުގައި ހައްޖުވެރިން ބަލާ އެއާޕޯޓަށް ދާ ގާތްތިމާގެ މީހުންނާއި އެއާޕޯޓަށް ދަތުރުކުރާ އެއްގަމު އުޅަނދު ދުއްވާ ފަރާތްތަކުން ފުލުހުންގެ އިރުޝާދުތަކާ އެއްގޮތަށް އަމަލުކުރުމަށެވެ.
ހައްޖުގެ އަޅުކަމަށް ފަހު، ދިވެހި ހައްޖާޖީންގެ ފުރަތަމަ ގްރޫޕު ހޯމަ ދުވަހު މާލެއަށް އަންނާނެ ކަމަށް އިސްލާމިކް މިނިސްޓްރީ އިން ވަނީ ބުނެފައެވެ.
ހައްޖުވެރިން ރާއްޖެ އަންނަން ހަމަޖެހިފައި ވަނީ:
- ޖޫން 24 - ހޯމަ
- ޖޫން 28 - ހުކުރު
- ޖުލައި 01 - ހޯމަ
- ޖުލައި 04 - ބުރާސްފަތި
ރާއްޖެއިން ހައްޖަށް ދިޔަ ހައްޖުވެރިންގެ ތެރެއިން މިހާތަނަށް ނިޔާވީ އެކަކުކަން އިސްލާމިކް މިނިސްޓްރީ އިން ފާހަގަ ކުރެއެވެ. އަދި މި ވަގުތު ހޮސްޕިޓަލުގައި އެކަކު އޮތްއިރު އާންމު ގޮތެއްގައި ހައްޖުވެރިންގެ ހާލު ރަނގަޅު ކަމަށް އެ މިނިސްޓްރީ އިން ވަނީ ބުނެފައެވެ.
މިއަހަރު ސައުދީ އަރަބިއްޔާއިން ރާއްޖެއަށް ދިން 1،000 ކޯޓާ މިފަހަރު ސަރުކާރުން ދީފައި ވަނީ ހައްޖު ކޯޕަރޭޝަނަށެވެ. އެގޮތަށް ނިންމާފައި ވަނީ ވަރަށް ގިނަ ޖަމާއަތްތަކުން މީހުން އަތުން ފައިސާނެގުމަށް ފަހު ހައްޖަށް ނުދެވުމުގެ މައްސަލަތަކުގެ އިތުރުން ބިޑް އުސޫލުން ކޯޓާ ނެގުމަށްފަހު، ބޮޑު އަގުގައި ކޯޓާ ވިއްކާ މައްސަލައަށް ހައްލު ހޯދައި ދިނުމަށް ކަމަށް އިސްލާމިކް މިނިސްޓްރީން ވަނީ ބުނެފައެވެ.
