އައްޑޫގައި މަސްވެރިން ކުރަމުންދާ އިހުތިޖާޖުގެ ބައިވެރިން މަސް ކެއްކުކަށް ހުރަސް އަޅާނެ ކަމުގެ އިންޒާރު ދީފިއެވެ.
މިފްކޯއިން މަސްވެރިންނަށް ދޭންޖެހޭ ފައިސާ ނުލިބޭ ކަމަށް ބުނެ އައްޑޫ ސިޓީގައި ދަނީ އިއްޔެ އިން ފެށިގެން އިހުތިޖާޖު ކުރަމުންނެވެ.
އިހުތިޖާޖުގެ ބައިވެރިން ގޮވާލަމުން ދަނީ މަސްވެރިންނަށް ދޭންޖެހޭ ފައިސާ މިހާރުން މިހާރަށް ދިނުމަށާއި ކުރިއަށް އޮތް ދުވަސްތަކުގައި ކިރުވާ މަހަށް ކޮންމެ 15 ދުވަހަކުން ފައިސާ ދިނުމަށް ސަރުކާރުން އެއްބަސްވުމަށެވެ.
އެ އިހުތިޖާޖާ ގުޅޭ މައުލޫމާތު ހިއްސާ ކުރަމުން ފުލުހުން ބުނީ، ފައިސާ ނުލިބޭ މައްސަލައިގައި އައްޑޫ ހުޅުމީދޫ މިފްކޯ ބަނދަރުގައި 80 ވަރަކަށް މަސްވެރިން ނުކުމެ މުޒާހަރާ ކުރަމުންދާ ކަމަށެވެ. މަސްވެރިންގެ އެ މުޒާހަރާ މިއަދު 12 ޖަހަންދެން ކުރިއަށް ދާނެ ކަމަށް އެމީހުން ބުނެފައިވާ ކަމަށް ފުލުހުން ވަނީ މައުލޫމާތު ދީފައެވެ.
އަދި މުޒާހަރާއާ ގުޅިގެން އެކަށީގެންވާ ޖަވާބެއް ނުލިބިއްޖެ ނަމަ، މަސް ފެކްޓަރީގެ ހުރިހާ ސީނިއާ މުވައްޒަފުން ފެކްޓްރީން ބޭރުކޮށް މަސް ކެއްކުމަށް ހުރަސް އަޅާނެ ކަަމުގެ އިންޒާރު އެމީހުން ދީފައިވާ ކަމަށް ފުލުހުން ބުންޏެވެ.
އައްޑޫ ސިޓީގައި މަސްވެރިންނަށް ލިބެންޖެހޭ ފައިސާ ނުލިބި އިހުތިޖާޖު ކުރަމުން ދާއިރު ދާދިފަހުން މަސްވެރިން ވަނީ ގދ. މަޑަވެލީގެ އިތުރުން މާލޭގައި ވެސް އިހުތިޖާޖެއް ކޮށްފައެވެ.
ބޮޑުކަންނެލި މަސްވެރިންގެ ޔޫނިއަން (ބީކޭއެމްޔޫ) އިން އިސްނަގައިގެން ކުރިއަށް ގެންދިޔަ އެ އިހުތިޖާޖުތަކާ ގުޅިގެން ސަރުކާރުން ވަނީ މަސްވެރިންނަށް ނުދީ ހުރި 80 މިލިއަން ރުފިޔާގެ ތެރެއިން 46 މިލިއަން ރުފިޔާ ދޫކޮށްފައި ވާކަމަށް ބުނެފައެވެ.
މަސްވެރިން ކިރާ މަހަށް 48 ގަޑިއިރު ތެރޭގައި ފައިސާ ދައްކާ ނިޒާމެއް ގާއިމު ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ނަމަވެސް ރާއްޖޭގެ މާލީ ހާލަތު ހުރި ގޮތުން އެ ފައިސާ ދިނުމުގައި ދަތިތަކެއް ދިމާވާ ކަމަށް ފިޝަރީޒް މިނިސްޓަރު، އަހުމަދު ޝިޔާމް ވަނީ މީގެ ކުރިންވެސް ވިދާޅުވެފައެވެ.
ރައީސް މުއިއްޒު ސަރުކާރާ ހަވާލުވެވަޑައިގެންނެވި އިރު ކުރީ ސަރުކާރުން މަސްވެރިންނަށް ނުދީ ހުރި 851 މިލިއަން ރުފިޔާ އެމަނިކުފާނުގެ ސަރުކާރުގައި ވަނީ ދޫކޮށް ހަލާސްކޮށްފައިކަން ފާހަގަ ކުރެވެއެވެ.
