ފުލުހުންގެ ތަރުޖަމާނު އަދި ޗީފް ސުޕްރިންޓެންޑެންޓް އަހްމަދު ޝިފާނާއި ސެންޓްރަލް ޕޮލިސިން ކޮމާންޑްގެ ހެޑު ޗީފް ސުޕްރިންޓެންޑެންޓް އަބްދުﷲ ޝަރީފް، އެސިސްޓަންޓް ކޮމިޝަނަރުގެ ރޭންކަށް ޕްރޮމޯޓްކޮށްފިއެވެ.
އިސްކަންދަރު ކޮށީގައި މިއަދު ބޭއްވި ރަސްމިއްޔާތެއްގައި ޝިފާނާއި ޝަރީފަށް ޕްރޮމޯޝަން ދިން ކަމުގެ ލިޔުން ހަވާލުކުރެއްވީ ހޯމް މިނިސްޓަރު އަލީ އިހްސާނެވެ.
އެސިސްޓަންޓް ކޮމިޝަނަރުގެ ރޭންކަކީ ކޮމިޝަނަރާއި ޑެޕިއުޓީ ކޮމިޝަނަރުގެ ރޭންކަށް ފަހު އެންމެ މަތީ ރޭންކެވެ. އަދި އެއީ އިދާރީގޮތުން ޕްރޮމޯޓްކުރެވޭ އެންމެ މަތީ ރޭންކު ވެސް މެއެވެ.
ކޮމިޝަނަރާއި ޑެޕިއުޓީ ކޮމިޝަނަރުން އައްޔަންކުރައްވަނީ ރައީސުލްޖުމްހޫރިއްޔާއެވެ.
މީގެ އިތުރުން ފުލުހުންގެ ދެ ސުޕްރިންޓެންޑެންޓުން ކަމަށްވާ އިސްމާއީލް ޝަމީމާއި އިބްރާހީމް ނަބީލް، ޗީފް ސުޕްރިންޓެންޑެންޓްގެ ރޭންކަށް ވެސް ވަނީ ޕްރޮމޯޓްކޮށްފައެވެ.
