މާލެ، މެދުޒިޔާރަތް މަގު ހޮޓެލް ޖެން ކައިރީގައި ޕާކުކޮށްފައި ހުރި ސައިކަލުތަކެއްގައި ރޯކޮށްލި މައްސަލައިގައި މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ އުމުރުން 36 އަހަރުގެ ދިވެހި ފިރިހެނެއް ކަމަށް ފުލުހުން ވަނީ ބުނެފައެވެ.
ފުލުހުން ބުނީ އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 30 ދުވަހަށް އޭނާ ބަންދު ކުރުމަށް ކޯޓުން އަމުރުކޮށްފައިވާ ކަމަށެވެ.
ފުލުހުން މީގެކުރިން ބުނެފައި ވަނީ ހޮޓެލް ޖެން ކައިރީގައި ޕާކުކޮށްފައި ހުރި ސައިކަލުތަކެއްގައި ރޯކޮށްލާފައިވާ ކަމުގެ ރިޕޯޓް ލިބިފައި މިދިޔަ ހޯމަ ދުވަހުގެ ރޭ މެންދަމު 3:03 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ. އަލިފާން ރޯވުމާއި ގުޅިގެން 7 ސައިކަލާއި ވޭނަކަށް ގެއްލުން ލިބިފައިވާއިރު ފުލުހުން ބުނީ މީގެ ތެރެއިން 3 ސައިކަލު ބޭނުން ނުކުރެވޭ ވަރަށް އަދާފައިވާ ކަމަށެވެ.
