މެނުއަލްކޮށް ޑޮކްޓަރުން ފުރައިދޭ (އަތުން ލިޔެދޭ) އާސަންދަ ރިކޮމެންޑޭޝަން ފޯމު ބަލައިގަތުން ހުއްޓާލައިފިއެވެ.
މެނުއަލްކޮށް ޑޮލްޓަރު ލިޔެދޭ އާސަންދަ ރެކޮމެންޑޭޝަން ފޯމް ބަލައިގަތުން ހުއްޓާލާފައި ވަނީ މި މަހުގެ 1 ވަނަ ދުވަހުއެވެ.
އާސަންދައިން ބުނީ އާސަންދަ ސްކީމްގެ ދަށުން ރާއްޖެއިން ބޭރުން ފަރުވާ ހޯދުމަށްޓަކައި ޑޮކްޓަރުން ފުރާ އާސަންދަ ރިކޮމެންޑޭޝަން ފޯމް ދެން ބަލައިގަންނާނީ ހަމައެކަނި މައި އާސަންދަ ޕޯޓަލްއިން ކަމަށެވެ. އަދި ފޯމާއެކު ހުށަހަޅަންޖެހޭ ލިޔެކިއުންތައް ވެސް އެ ޕޯޓަލް މެދުވެރިކޮށް ހުށަހެޅޭނެ ކަމަށް އެ ކުންފުނިން ބުނެއެވެ.
އާސަންދައިގެ ހިދުމަތް ފުޅާ ކުރުމަށް އެ ކުންފުނިން އަންނަނީ މަސައްކަތްތަކެއް ކުރަމުންނެވެ. އެގޮތުން އާސަންދަ މެދުވެރިކޮށް ޔޫއޭއީ އަދި ތައިލެންޑްއިން ބޭސް ފަރުވާ ކުރެވޭނެ އިންތިޒާމު ހަމަޖެއްސުމަށް ވެސް އެ ކުންފުނިން އަންނަނީ މަސައްކަތް ކުރަމުންނެވެ.
އާސަންދައިގެ ތަފާސް ހިސާބުތަކުން ދައްކާ ގޮތުގައި މި ހިނގާ 2024 ވަނަ އަހަރުގެ ފުރަތަމަ ކުއާޓާގައި އާސަންދައަށް ކުރި ހޭދަ ވަނީ 838 މިލިއަން ރުފިޔާއަށް އަރާފައެވެ. އެއީ، މިދިޔަ އަހަރުގެ އެ މުއްދަތާ އަޅައިބަލާއިރު، 4.8 ޕަސެންޓުގެ އިތުރުވުމެކެވެ.
