އެކި ފަހަރުމަތިން މީހުންގެ އަތުން ފައިސާ ފޭރެމުން ދިޔަ 4 މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން ބުނީ ރޭ ހުޅުމާލެ ފޭސް2 ގެ އެޗް1 ކައިރީގައި މީހަކުގެ އަތުން ފޭރެން އުޅުނު ބަޔަކު، އާންމުން ހިފަހައްޓައިގެން އުޅޭ ކަމުގެ ރިޕޯޓް އެ އިދާރާއަށް ލިބިފައިވާ ކަމަށެވެ. އަދި މި މައްސަލަ އާއި ގުޅިގެން ފުލުހުން މައުލޫމާތު ސާފުކުރުމަށް އެމީހުން ހިފަހައްޓާ ސުވާލުކޮށްފައިވާއިރު، އެމީހުންނަކީ މީގެ ކުރިންވެސް އެކި ފަހަރު މަތިން މީހުންގެ އަތުން ގިނަ އަދަދެއްގެ ފައިސާ ފޭރިފައިވާ ބައެއް ކަމުގެ މައުލޫމާތު ލިބިފައިވާ ކަަމށެވެ.
މި މައްސަލައާއި ގުޅިގެން 4 ދިވެހިން ހައްޔަރުކޮށްފައިވާއިރު، ހައްޔަރުކޮށްފައިވަނީ 32 އަހަރުގެ 2 މީހުންނާ، 36 ގެ މީހެއްގެ އިތުރުން 45 ގެ މީހެކެވެ. މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެވެ.
ފަހަކަށް އައިސް މަލެ ސަރަހައްދުގައި ފޭރުމުގެ މައްސަލަ އިތުރުވަމުން އަންނައިރު،ދާދިފަހުން ވެސް ހުޅުމާލެ ފޭސް2 ގެ އެޕާޓްމަންޓަށް މީހުން ގެންގޮސް ބިރުދައްކާ ފޭރުމުގެ މައްސަލައެއް ވަނީ ފެންމަތިވެފައެވެ.
