"ސްމާޓް ގަވަނަންސް ފޯ ސިވިލް ސާވިސް އެކްސަލަންސް" ޝިއާރުގެ ދަށުން ސިވިލް ސާވިސް ކޮނަފރެންސް އަންނަ މަހުގެ 9 އިން 10 ވަނަ ދުވަހަށް ދަރުބާރުގޭގައި ބާއްވަން ނިންމައިފިއެވެ.
ސިވިލް ސާވިސް ކޮމިޝަނުން ބުނީ، މި ކޮންފަރެންސް އަކީ އެ ކޮމިޝަންގެ އިންތިޒާމްތައް ރާވާފައިވާ ގޮތްތައް ދިރާސާކޮށް ފެންވަރު ރަނގަޅު ހިދުމަތްތަކެއް ފޯރުކޮށްދިނުމަށް ހަމަޖައްސަން ޖެހޭ އިންތިޒާމްތައް ދެނެގަތުމަށް ބާއްވާ ކޮންފަރެންސެއް ކަމަށެވެ.
"ސްމާޓް ގަވަނަންސް ފޯ ސިވިލް ސާވިސް އެކްސަލަންސް" މި ޝިއާރުގެ ދަށުން ގުޅުން ހުރި ތިން ދާއިރާއަކުން 15 ކަރުދާހެއް މި ކޮންފަރެންސްގައި ހުށަހަޅަނެ ކަމަށް އެ ކޮމިޝަނުން ބުނެއެވެ. އަދި މި ކޮންފަރެންސްގައި ރާއްޖެއިން ބޭރުގެ ދެ ސްޕީކާއަކާއި ރާއްޖޭގެ ދެ ސްޕީކާއެއް ކީނޯޓް ސްޕީޗް ދިނުމަށް ހަމަޖެހިފައިވާ ކަމަށް އެ ކޮމިޝަނުން ބުނެއެވެ.
މި ކޮންފަރެންސްގެ ސަބް ތިންގެ ގޮތުގައި ކަނޑައަލާފައިވާ ތިން ޝިއާރަކީ، ޒަމާނީ ޓެކްނޮލޮޖީގެ އަލީގައި އޮފީހުގެ އެކިކަހަލަ މަސައްކަތްތަކާއި ޕްރޮސީޖާތައް ބަދަލުކޮށް ހަރުދަނާ ކުރުމާއި، ރައްޔިތުންނަށް ފުރިހަމަ ހިދުމަތެއް ފޯރުކޮށްދެވޭ ޒިންމާދާރު އަދި ޖަވާބުދާރީ ވެވޭ ސިވިލް ސާވިސް އެއް ގާއިމް ކުރުމެވެ. އަދި ހރުދަނާ އުސޫލުތަކާއި އަހްލާގީ މިންގަނޑުތަކަށް ބިނާކޮށް މަސައްކަތުގެ ސަގާފަތް ބައްޓަން ކުރުމެވެ.
މި ކޮންފަރެންސްގައި ސިވިލް ސާވިސްގެ އެންމެ އިސް ފަންތީގައި މަސައްކަތް ކުރާ 250 އަށް ވުރެ ގިނަ ބައިވެރިވުމަށް ވަނީ ހަމަޖެހިފައެވެ. މީގެ ތެރޭގައި މިނިސްޓްރީތަކުގެ ޕާމަނަންޓް ސެކެޓްރީންނާއި، ސްޓޭޓް އަދި ޑެޕއިއުޓީ މިނިސްޓަރުން ހިމެނެއެވެ. ހަމައެއާއެކު ސިޓީތަކާއި އަތޮޅު ކައުންސިލްތަކުގެ މޭޔަރުންނާއި ރައީސުން އަދި ނައިބުންގެ އިތުރުން ކައުންސިލްތަކުގެ ސެކެޓްރީ ޖެނެރަލް ހިމެނޭ ގޮތަށް 113 އަށް ވުރެ ގިނަ ފަރާތްތަކުން ބައިވެރިވުމަށް ހަމަޖެހިފައިވާ ކަމަށް އެ ކޮމިޝަނުން ބުނެއެވެ.
މި ކޮންފަރެންސްއަކީ ކޮންމެ ދެ އަހަރަކުން އެއް އަހަރު ސިލްސިލާކޮށް ބާއްވަމުން އަންނަ ކޮންފަރެންސެކެވެ.
