ކަނޑުމަހުގެ ވިޔަފާރީގެ ބާޒާރުގަައި ހަރަކާތްތެރިވާ ހުރިހާ ފަރާތްތަކަަށްވެސް ހަމަހަމަ ފުރުސަތުތަކެއް އޮންނަން ޖެހޭކަމަށް ފިޝަރީސް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.
ތައިލޭންޑްގެ ވެރިރަށް ބެންކޮކްގައި ކުރިއަށް ދިޔަ 18 ވަނަ އިންފޯ ފިޝް ވޯލްޑް ޓޫނާ ޓްރޭޑް ކޮންފަރެންސް އެންޑް އެގްޒިބިޝަން މިނިސްޓަރު މިހެން ވިދާޅުވީ ތަރައްގީވަމުން އަންނަ ގައުމުތަކުން މަހުގެ އުފެއްދުންތައް މާކެޓަށް ވެއްދުމަށް ހުރި ހުރަސްތައް ނައްތާލުމާއި ގުޅޭ ގޮތުން ވާހަކަދައްކަމުންނެވެ.
ބައިނަލްއަގުވާމީ ބާޒާރުގައި ފުޅާ ދާއިރާއެއްގައި ހަރަކާތްތެރިވާ ފަރާތްތަކާ ވާދަކުރުމަށް ރާއްޖެ ފަދަ ތަރައްގީވަމުން އަންނަ ގައުމުތަކަށް ބޮޑެތި ދަތިތަކެއް އެބަހުރިކަން ފާހަގަކުރައްވަމުން މިނިސްޓަރު ވިދާޅުވީ ތަރައްގީވަމުން އަންނަ ކުދި ގައުމުތަކުން އުފައްދާ މަހުގެ ބާވަތްތަކަށް ބައިނަލްއަގުވާމީ ބާޒާރުން ފުރުސަތު ހޯދުމަށް ހުރި ދަތިތައް ނައްތާލަންޖެހޭ ކަމަށެވެ.
މީގެ އިތުރުން މިނިސްޓަރު ވަނީ ގަވާއިދާއި ހިލާފަށް ކުރާ މަސްވެރިކަމުގެ ސަބަބުން ލިބޭ ގެއްލުންތަކާ އެ މައްސަލަ ހައްލުކުރުމަށް ސަވައިލެންސް ހަރުދަނާކޮށް މަސްވެރިކަމުގެ އޮނިގަނޑު ހަރުދަނާ ކުރުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާފައެވެ. ގޮތުން މިނިސްޓަރު ވިދާޅުވީ ގަވައިދާއި ހިލާފަށް ކުރާ މަސްވެރިކަމުގެ ސަބަބުން މަސްވެރިންނާއި މަސްވެރިކަމަށް ބަރޯސާވާ މުޖްތަމައުތަކަށް އޮތް ނުރައްކާ ބޮޑުކަމަށެވެ. އަދި ގަވާއިދާ ހިލާފަށް ކުރާ މަސްވެރިކަމުގެ ސަބަބުން، ރާއްޖެފަދަ ދެމެހެއްޓެނިވި މަސްވެރިކަން ކުރާ ގައުމުތަކުން ކުރާ މަސައްކަތްވެސް ނާކާމިޔާބު ވެގެންދާކަން މިނިސްޓަރުވަނީ ފާހަގަކުރައްވާފައެވެ.
