މި ދުވަސްވަރަކީ ވައިގަދަ އަދި ވިއްސާރަ ދުވަސްވަރަކަށް ވުމާއެކު ބްރިޖުން ދަތުރުކުރާއިރު ސަމާލުވުމަށް މޯލްޑިވްސް ޕޮލިސް ސާވިސް އިން އިލްތިމާސް ކޮށްފިއެވެ.
އެކްސްގައި ކުރި ޕޯސްޓެއްގައި މޯލްޑިވްސް ޕޮލިސް ސާވިސް އިން ބުނީ ސައިކަލު ދުއްވާއިރު ކުޑަނަގައިގެން ނުދުއްވުމަށާއި ފަސޭހައިން ހަލާކުވެ ވަޔާދާ ފަދަ ކޯޓު ބޭނުންނުކުރުމަށް އިލްތިމާސް ކުރާ ކަމަށެވެ. އަދި ހެލްމެޓުވެސް ވަޔާ ނުދާނޭހެން ރަނގަޅަށް އެޅުމަށް ޕޮލިހުން ވަނީ އިރުޝާދު ދީފައެވެ.
މީގެއިތުރުން އުޅަނދުގެ ލައިޓުތައް ދިއްލޭތޯ ބަލާ ސަލާމަތާއި ރައްކާތެރިކަން ކަށަވަރު ކޮށްގެން އުޅަނދު ދުއްވުމަށްވެސް މޯލްޑިވްސް ޕޮލިސް ސާވިސް އިން ވަނީ ބުނެފައެވެ.
ވައި ގަދަވެ ވިއްސާރުވުމާ ގުޅިގެން މިއަދު ވަނީ ވެލާނާގެ ކުރިމަތީގައި ހުރި ގަހެއްގެ ބައެއް ވެއްޓި 2 ސައިކަލަކަށް ގެއްލުންވެފައެވެ. އަދި ހިޔާ ވަގުތީ މާކެޓުގެ ފުރާޅުން ޓިނު ގަނޑެއްވެސް ގަދަ ވަޔާއެކު މިއަދު ވަނީ އެއްލާލާފައެވެ.
ކުރިއަށް އޮތް 3 ދުވަހުވެސް ރާއްޖޭގެ ބޮޑު ބަޔަކަށް ވިއްސާރަކޮށް ވައިގަދަވާނެ ކަމަށާއި ރާއްޖޭގެ ކަނޑުތައް ގަދަވާނެ ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން ވަނީ ބުނެފައެވެ.
މެޓް އޮފީހުން ވަނީ ހއ. އަތޮޅުނެ ފެށިގެން ތ. އަތޮޅަށް މިއަދުގެ 20:30 އިން 00:30 އަށް ރީނދޫ އެލާޓު ނެރެފައެވެ. މެޓުން ބުނީ މި ސަރަހައްދަށް ގަޑިއަކު 28 މޭލާ 35 މޭލާ ދެމެދު ބާރުމިނެއްގައި ވައި ޖެހި އަދި ވިލާގަނޑުގައި ގަޑިއަކު 55 މޭލަށް ވައި ގަދަވާނެ ކަމަށާއި ކަނޑުތައް ގަދަވާނެ ކަމަށެވެ.
