ސާރާ އަލްޖަމާލް އަކީ އުފަންވިއިރު ވެސް ހިތުގައި ލޯވަޅެއް ހުރި ކުއްޖެކެވެ. އުފަންވިއިރު ވެސް ސާރާ އަކީ ކަށިތަކާ ހުޅުތަކުގައި އުނިކަމެއް ހުރުމުން އެންމެ ކުޑައިރުއްސުރެ ސިއްހީ ގިނަ މައްސަލަތައް ކުރިމަތިވަމުން ދިޔަ ކުއްޖެކެވެ. ފުރޮޅުލީ ގޮނޑިއެއްގައި އިންނަން ޖެހުނު ނަމަވެސް ފަލަސްތީނުގެ ގާޒާއަށް އުފަން 20 އަހަރުގެ ސާރާ އަކީ ވަރަށް ހިތްވަރުގަދަ، ސާބިތު ޒުވާނެކެވެ.
އަބަދުވެސް ދިރިއުޅުމަށްޓަކައި ފޮނި ހުވަފެންތަކެއް ދެކެމުން އައި ސާރާގެ އެންމެ ބޮޑު ހުވަފެނަކީ އެނިމޭޓެޑް ފިލްމުތައް ޓެންގްލްޑް ނުވަތަ ރަޓަޓޫއީގެ ވޮއިސްއޯވާ ހެދުމަށެވެ. އޭނާ ވަނީ މެދުއިރުމަތީގެ އެންމެ މަޝްހޫރު އެއް ވޮއިސް އެކްޓަރު ފުއާދު ޝަމްސް އާ އެކު ވޮއިސް އެކްޓިން ކްލާސްތައް ނަގަން ފަށާފައެވެ. އަޑާއި އެކްޓިން ދަސްކުރުމުގެ އިތުރުން ސާރާ ދިޔައީ ތަރުޖަމާ ކުރުމުގެ މަސައްކަތްތަކާއި ނުކުޅެދުންތެރިކަމުގެ މައްސަލަތަކުގައި ބައިނަލްއަގްވާމީ އިންސާނީ އެހީދޭ ފަރާތްތަކާ ގުޅިގެން ވެސް މަސައްކަތް ކުރަމުންނެވެ. އޭނާގެ ހުވަފެނަކީ، ގިނަ ޒުވާން އަންހެނުން ފަދައިން، މިނިވަންކަމާއެކު އަމިއްލަ ފައިމައްޗަށް ތެދުވުމެވެ.
އެހެންނަމަވެސް އެ ހުރިހާ ހުވަފެނެއް ބިމާ ހަމަވީ ގާޒާއާ ދެކޮޅަށް ހައްދުފަހަނަޅާފައިވާ އިޒްރޭލުން ފެށި ހަނގުރާމައާ އެކުގައެވެ. ހަނގުރާމައިގެ ފުރަތަމަ ދުވަހު އޭނާގެ އާއިލާ ދިރިއުޅެމުން އައި ގެ ބާރުގަދަ ބޮންތަކާއެކު ބިމާ ހަމަވިއެވެ. އަމިއްލަ ވަޒަނާއި ގެދޮރު ދޫކޮށް، ފާއިތުވި ދުވަސްތަކުގައި ރަފާ ގެ އިމާރާތެއްގެ ގްރައުންޑް ފްލޯގައި ހުރި އެއް ކޮޓަރީގައި ދިރިއުޅެމުން ދިޔަ އޭނާގެ އާއިލާގެ 8 މީހުންނަށް މިދިޔަ ހޯމަ ދުވަސް ވެގެން ދިޔައީ ބިރުވެރި ދުވަހަކަށެވެ.
އެ ސިޓީގެ އިރުމަތީ ސަރަހައްދުގައި ދިރިއުޅެމުން ދިޔަ ގިނަ ބަޔަކު ފަދައިން، ހޯމަ ދުވަހުގެ ހެނދުނު އިޒްރޭލު ސިފައިންގެ އިންޒާރުގެ މެސެޖު އެ އާއިލައަށް ވެސް ލިބުނެވެ. ރަފާ އިން ނިކުމެ އަލްމަވާސީ އަށް ދިއުން ނޫން ގޮތެއް އެ ވަގުތަކު ނެތެވެ. އެހެންނަމަވެސް ކިރިޔާ ދެތިން މީޓަރު ހިނގާލެވޭ ސާރާއަށް ލިބުނީ ބޮޑު މާޔޫސް ކަމެކެވެ. އިޒްރޭލުގެ ހަމަލާތަކާއެކު ރަފާ ގައި ކުރިމަތިވެދާނެ ނުރައްކަލުން ސަލާމަތް ވުމަށް ރަފާ ހުރަސްކޮށް މިސްރަށް ވަނުމަށް ސާރާ މަސައްކަތް ފެށި ނަމަވެސް އެކަން އޭނާއަށް ކާމިޔާބެއް ނުވިއެވެ. އާއިލާ ނެރުމަށް ފައިސާ ދައްކަން ޖެހުމާއެކު ފައިސާ ހޯދަން މަސައްކަތް ކުރަމުން އައި، ސާރާއަށް އިތުރު މާޔޫސްކަމެއް ލިބިގެން ދިޔައީ ރަފާ ހުރަސްކޮށް މިސްރަށް ވަދެވޭނެ ދޮރުތައް އިޒްރޭލުން ބަންދު ކުރުމުންނެވެ.
އެހެންނަމަވެސް އަދިވެސް ސާރާގެ ހިތްވަރު ބައްޔެއް ނުވެއެވެ. ރަފާ ގެ އެ ބިރުވެރިކަމާއި އޭނާގެ އާއިލާއަށް ކުރިމަތިވާނެ ކަންކަމާ މެދު ސާރާ ވިސްނައެވެ. ހައްދުފަހަނަޅާފައިވާ އިޒްރޭލުގެ ހަމަލާތަކާއެކު، އަދިވެސް އެމީހުން މަސައްކަތް ކުރަމުން ދަނީ އަލްމަވާސީ އަށް ދަތުރު ކުރެވޭނެ އެއްވެސް މަގެއް ފެނޭތޯއެވެ. ސާރާގެ އާއިލާ މިސްރަށް އެތެރެވުމަށް ބޭނުންވާ ފައިސާ ހޯދުމަށް ސޯޝަލް މީޑިއާގައި ކެމްޕެއިނެއް ވެސް ފަށާފައި ވާއިރު، ރަފާ ހުރަސްކޮށް މިސްރަށް ދެވޭނެ އެއްވެސް މަގެއް ފެނުނަސް އެމީހުން ދާންޖެހޭނީ ހިނގާފައެވެ. ފުރޮޅުލީ ގޮނޑިއެއްގައި ސާރާ ކުރަންޖެހޭ އެ ބިރުވެރި ދަތުރާއެކުވެސް އޭނާ ވަނީ ދިރިއުޅުމުގެ ހަނގުރާމައަށް ނިކުމެފައެވެ.
