ބޯކޮށް ވާރޭވެހުމުގެ ސަބަބުން ހިނގި ހާދިސާއެއްގައި ހައިވޭ އެއްގެ ބައެއް ވެއްޓި ޗައިނާގައި 48 މީހަކު މަރުވެއްޖެއެވެ.
ޗައިނާގެ ދެކުނު ބިތުގައި އޮންނަ މެއިޒޯ އާއި ގުއަންގްޑޮންގް ގެ އަވަށެއް ކަމަށްވާ ޑަބޫ އާ ގުޅުވާލަ ދޭ ހައިވޭގެ މެދުތެރެއިން ކަނޑައިގެން ގޮސް ބައެއް ވެއްޓުނު އިރު އެ ހައިވޭއިން ގިނަ އަދަދެއްގެ ވެހިކަލް ދިޔައީ ދުއްވަމުންނެވެ. ހައިވޭ ކަނޑައިގެން ގޮސް ވެލިގަނޑާއެކު ފައިބައިގެން ދިޔަ ވަގުތު ވެހިކަލްތައްވެސް ވަނީ ހައިވޭއިން ކަހާލައިގެން އެތަނަށް ވެއްޓިފައެވެ.
ގިނަ އަދަދެއްގެ ވިހިކަލް އެތަނަށް ވެއްޓިގެން ދިޔަ އިރު މަރުވި މީހުންގެ އަދަދު 48 އަށް އަރައެވެ. އަދި ސަލާމަތް ކުރެވުނު 23 ވެހިކަލެއްގައި ތިބި 30 މީހަކަށް އެކިވަރުގެ އަނިޔާ ލިބިފައިވާ ކަމަށް ހަބަރުތައް ބުނެއެވެ.
މީހުން ސަލާމަތް ކުރުމުގެ މަސައްކަތުގައި 500 އެއްހާ އޮފިޝަލުން ހަރަކާތްތެރި ވަމުން ދިޔަ އިރު ހައިވޭ ކަނޑައިގެން ގޮސް ވެއްޓުނު ސަރަހައްދުގެ ބޮޑުމިނުގައި 184 ސްކެއާ މީޓަރު ހުރި ކަމަށް ގުއަންގްޑޮންގް ގެ އޮފިޝަލުންނާ ހަވާލާދީ މީޑިއާ ރިޕޯޓުތައް ބުނެއެވެ.
ޗައިނާގެ ދައުލަތުގެ މީޑިއާ އިން ބުނީ މިހާދިސާ އާ ގުޅިގެން މަސައްކަތުގެ މާހައުލުގައި އެފަދަ ބޮޑެތި މަޝްރޫއުތައް [ހައިވޭ ހެދުން ފަދަ] ހިނގާ އިރު މަސައްކަތުގެ ފެންވަރާއި މޫސުމީ އެކިއެކި ހާދިސާތަކަށް ރައްކާތެރިތޯ ބެލުމަށް ހާއްސަ އިންސްޕެކްޝަނެއް ކުރަން ޖެހޭގޮތަށް ބަދަލުތައް ސަރުކާރުން ގެންނާނެއެވެ.
މިހާދިސާ އާ ގުޅިގެން ޗައިނާގެ ރައީސް ޝީ ޖިންގްޕިން ވަނީ ހާއްސަ އޯޑަރެއްވެސް ނެރުއްވާފައެވެ. އިދާރާތަކަށް އޭނާ ގޮވާލައްވާފައި ވަނީ, މޫސުމީ ތަފާތު ކާރިސާތަކާ ދިމާވެދާނެ ހާލަތްތަކަށް ބަލައި އިންޒާރުދޭ ނިޒާމުތައް ވަރުގަދަ ކުރުމަށެވެ.
ގުއަންގްޑޮންގް އަކީ ޗައިނާގެ ވިޔަފާރީގެ މައި އެއް މަރުކަޒެވެ. ޖުމްލަ 127 މިލިއަން މީހުން ދިރިއުޅޭ މިސަރައްދުގައި ބޮޑެތި ފެކްޓަރީ ތަކާއި އުމްރާނީ އެތައް މަސައްކަތްތަކެއް ހިނގަމުން ދެއެވެ.
ފާއިތުވި ދެތިން ހަތަރު ހަފްތާގައި މި ސަރަހައްދަށް އާދަޔާ ހިލާފު ބޯކޮށް ވާރޭ ވެހިފައި ވާ އިރު ބައެއް ސަރަހައްދުތަކުގައި ފެންބޮޑުވެ އުޅުމަށް ދަތިވާވަރު ވެގެން 110,000 މީހަކު ރައްކާތެރި ސަރަހައްދުތަކަށް ވެސް ގެންގޮސްފައި ވެއެވެ.
