އަންނަ އޭޕްރިލް މަހުގެ ފަހުކޮޅު ގައުމީ އެއާލައިން މޯލްޑިވިއަނުން ރާއްޖެ އާއި އަވަށްޓެރި ސްރީލަންކާ އާ ދެމެދު ސީދާ ދަތުރުތައް އަލުން ފަށަން ތައްޔާރު ކަމަށް ހާމަކޮށްފިއެވެ.
އެކަން ހާމަކޮށް ނެރުނު ނޫސްބަޔާނެއްގައި މޯލްޑިވިއަނުން ބުނީ، ވެލާނާ އެއާޕޯޓާއި ސްރީލަންކާގެ ވެރިރަށް ކޮލަމްބޯގެ ބަންޑާރަނައިކެ އިންޓަނޭޝަނަލް އެއާޕޯޓާ ދެމެދު، އަންނަ އޭޕްރިލް މަހުގެ 25 ވަނަ ދުވަހުން ފެށިގެން ސީދާ ދަތުރުތައް އަލުން ފަށާނެ ކަމަށެވެ.
މޯލްޑިވިއަންގެ މެނޭޖިން ޑިރެކްޓަރު އިބްރާހީމް އިޔާސް ވިދާޅުވީ، މޯލްޑިވިއަނުން ރާއްޖެ އާއި ލަންކާ އާ ދެމެދު ދަތުރުތައް ފެށުމުގެ ސަބަބުން ވިޔަފާރި އާއި ޗުއްޓީ އަށް ދަތުރުކުރާ މީހުންނަށް އިތުރަށް ފަސޭހަވެގެން ދާނެ ކަމަށާއި، މިއީ ބޭރު ގައުމުތަކާއި ރާއްޖެ ކުރިއަށް ވުރެ ބޮޑަށް ގުޅާލުމަށް އެޅުނު މުހިންމު ފިޔަވަޅެއް ކަމަށެވެ.
މި ދަތުރުތަކާ ބެހޭ ގޮތުން މޯލްޑިވިއަނުން އިތުރަށް ބުނި ގޮތުގައި:
- މިއަދުން ފެށިގެން މޯބައިލް އެޕާއި ވެބްސައިޓުން ޓިކެޓް ބުކްކުރެވޭނެ
- އުދުހުންތައް އޮންނާނީ ހަފްތާ ބަންދުގައި (ބުރާސްފަތި ދުވަހާއި ހޮނިހިރު ދުވަހު)
- މިގޮތުން ދެ ފްލައިޓް ކޮންމެ ހަފްތާ ބަންދެއްގައި އޮޕަރޭޓްކުރާނެ
މީގެ ކުރިން ވެސް މޯލްޑިވިއަނުން ރާއްޖެ އާއި ލަންކާ އާ ދެމެދު ދަތުރުތައް ބާއްވާފައިވެއެވެ. މޯލްޑިވިއަނުން ގެންދަނީ އިންޑިއާ އާއި ބަންގްލަދޭޝަށް ސީދާ ދަތުރުތައް ކުރަމުންނެވެ.
