ބަޔޯޑައިވަރސިޓީ ބިޔޯންޑް ނޭޝަނަލް ޖުރިސްޑިކްޝަން (ބީ.ބީ.އެން.ޖޭ) ގައި ރާއްޖެއިން ބައިވެރިވުމަށް ރުހުން ހޯދުމަށްޓަކައި މަޖިލީހަށް ހުށަހަޅަން ނިންމައިިފިއެވެ.
އެގޮތުން އ.ދ. ގެ އާންމު މަޖިލީހުގައި ފާސްކުރެވުނު މި މުއާހަދާގައި ބައިވެރިވުމަށް ވަޒީރުންގެ މަޖިލީހުން ލަފާދެއްވާފައިވާތީ އެކަމާމެދު ރައްޔިތުންގެ މަޖިލީހުގެ ރުހުން ހޯދުމަށް ހުށަހެޅުއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފައިވަނީ މިއަދު ބޭއްވި ވަޒީރުންގެ މަޖިލީހުގެ ބައްދަލުވުމުގައެވެ.
މި މުއާހަދާއަކީ ކަނޑުގެ ދިރުންތަކާއި ސަރަހައްދުތައް ހިމާޔަތްކޮށް ރައްކާތެރިކުރުމަށް އެކުލަވާލާފައިވާ މުއާހަދާއެކެވެ. މި މުއާހަދާގެ ދަށުން ކަނޑުގެ ދިރުންތައް ރައްކާތެރިކުރުމަށް ބައިނަލްއަގުވާމީ ފެންވަރުގައި މަސައްކަތްކުރުމަށް ވަނީ ނިންމާފައެވެ. މީގެއިތުރުން މޫސުމަށް އަންނަ ބަދަލުތަކަށް ރައްކާތެރިވުމާއި، ތިމާވެށްޓައް ގެއްލުން ލިބޭފަދަ ކަންކަމަށް މީހުން އަހުލުވެރިކުރުވުންވެސް ހިމެނެއެވެ.
ދުނިޔޭގެ 83 ގައުމަކުން މި މުއާހަދާގައި ބައިވެރިވުމަށް ސޮއިކޮށްފައިވާއިރު ރާއްޖެ ފަދަ ޖަޒީރާ ގައުމަކުން މިފަދަ މުއާހަދާއެއްގައި ބައިވެރިވުމަކީ މުހިންމުކަމެއްކަމަށް ރައީސް އޮފީހުން ނެރުނު ބަޔާނުގައި ބުނެފައިވެއެވެ.
ރައީސް މުއިއްޒު ތ އަތޮޅަށް ކުރެއްވި ދަތުރުފުޅުގެ ތެރެއިން ވޭމަންޑޫގައި ބޭއްވި ޖަލްސާގައި ވިދާޅުވީ ކަނޑުގެ ސަރަހައްދު މީގެ ކުރިން ބެލެހެއްޓިފައި ނުވާއިރު ކަނޑުގެ ސަރަހައްދަކީ މިއަދުވެސް ރައްޔިތުން އިގްތިސޯދީ ފައިދާ ހޯދަން އޮތް ސަރަހައްދު ކަމަށެވެ. އަދި ރާއްޖޭގެ ކަނޑުގެ ސަރަހައްދު ބެލެހެއްޓުމަށްޓަކައި ކުރަންޖެހޭ ކަންކަން ކުރުމަށް ވާން ޖެހޭ ތައްޔާރީތައް މިހާރު ދަނީ ވަމުން ކަން އެމަނިކުފާނު ފާހަގަކުރެއްވިއެވެ.
