ފުލުހުން ހިންގި އޮޕަރޭޝަނެއްގައި، ސައްހަ ނޫން ޑޮލަރު ގެންގުޅުނު މީހަކު ހައްޔަރުކޮށް ބަންދުގެ މުއްދަތު ޖަހައިފިއެވެ.

ފުލުހުން ބުނީ މި މައްސަލައިގައި ހައްޔަރުކޮށްފައިވަނީ އުމުރުން 57 އަހަރުގެ ފިރިހެނެއްކަމަށެވެ. އޭނާގެ ބަންދާ މެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން އޭނާވަނީ ކޯޓުގައި އެކަމަށް އިންކާރު ކޮށްފައެވެ. އެހެންނަމަވެސް ފުލުހުން ވަނީ ހެކީގެ ގޮތުގައި އޭނާ ގެންގުޅުނު ޑޮލަރުތަކުގެ ފޮޓޯ ކޯޓަށް ހުށަހަޅާފައެވެ.

ފުލުހުން ހުށަހެޅި ހެކިތަކާ ގުޅިގެން އޭނާ ކޯޓުގައި ބުނެފައިވަނީ އެއީ މަގުމަތިން ފެނުނު ކޮތަޅެއްގެ ތެރޭގައި ހުރި ޑޮލަރު ކަމަށާއި އެއީ އޭނާއާއި ގުޅުމެއް ހުރި ޑޮލަރުތަކެއް ނޫން ކަމަށެވެ.

މި މައްސަލަައިގައި ފުލުހުން ހުށަހެޅި ހެއްކިތަކަށް ބެލުމަށްފަހުނކޯޓުން ވަނީ އޭނާގެ ބަންދަށް 15 ދުވަސް ޖަހާފައެވެ.

ފަހަކަށް އައިސް 'ފޭކު' ފައިސާއިން މީހުންނަށް އޮޅުވާލައިގެން ވިޔަފާރިކުރާ މައްސަލަތައްވެސް މަދުމަދުން ފެންމަތިވަމުން އަންނައިރު، އޮޅުވާލައިގެން ފައިސާ ހޯދާ މައްސަލަތަކާއި ވައްކަމުގެ މައްސަލަތައްވެސް ވަނީ ވަރަށް ބޮޑަށް އިތުރުވެފައެވެ.