ރައްޔިތުންނަށް ބޯހިޔާވަހިކަން ހޯދައިފިނުމަށް ހިއްކާ ފުށިދިއްގަރުފަޅުގެ މަޝްރޫއުގައި ގާނޫނާއި ގަވާއިދާ ހިލާފު ވެވަޑައިގެންފައި ނުވާނެ ކަމަށް އާބަންކޯގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފަޒުލް ވިދާޅުވީ އެ މައްސަލާގައި އާންމުންގެ މީހަކު އޭސީސީއަށް މައްސަލަ ހުށަހަޅާފައި ވާކަން ފާހަގަކުރައްވާ ފަޒުލް ވަނީ އެކަމަށް މަރުހަބާ ވިދާޅުވެ ކޮންމެ ރައްޔިތަކުވެސް ކަންބޮޑުވުން ހިއްސާކުރެއްވުމަށް އެދިވަޑައިގެންފައެވެ. އަދި މި ހިސާބަށް އަންނަ ކުރި މަސައްކަތްތައް ދިރާސާ ކުރުމަށްވެސް ފަޒުލް ވަނީ އެދިވަޑައިގެންފައެވެ.
އޭސީސީ އަށް ހުށަހަޅާފައި ވަނީ ބިޑު ނުކޮށް އަދި ބަޖެޓުގައި ނުހިމަނާ މަޝްރޫއު ފެށުމާ ގުޅޭ މައްސަލައަކަށް ވާއިރު އަންނަ އަހަރަށް ކަނޑައަޅަން ރައްޔިތުންގެ މަޖިލީހަށް ހުށަހެޅި ބަޖެޓު ހުށަހެޅިއިރު ފުށިދިއްގަރުފަޅު ހިއްކުމަށް ފިނޭންސް މިނިސްޓްރީ އިން ވަނީ 400 މިލިއަން ރުފިޔާ ހިމަނާފައެވެ. ނަމަވެސް މަޖިލީހުގެ ބަޖެޓް ކޮމިޓީއިން އަންނަ އަހަރަށް ލަފާ ކުރެވޭ ބަޖެޓު ފާސްކޮށްފައި ވަނީ ފުށިދިއްގަރު ފަޅު ހިއްކުމުގެ މަޝްރޫއަށް ކަނޑައެޅި ފައިސާ އުނިކުރުމަށް ފަހުގައެވެ.
ފަޒުލް ވިދާޅުވީ އިންޓަނޭޝަލް ބިޑިންއެއް ސީދާ ނުހުޅުވާލި ކަމުގައި ވިޔަސް މިއީ ލިބިފައިވާ އިންޓަނޭޝަލް ކުންފުނިތައް ކަމަށާއި އެގޮތަށް ނިންމާފައިވަނީ ޕްރޮޕޯސަލް އިވެލުއޭޓް ކުރުމަށް ފަހުގައި ކަމަށެވެ. އަދި އެގޮތަށް މި ސަރުކާރަށް ލިބުނު ޕްރޮޕޯސަލްގެ އަލީގައި މިއީ އެންމެ ރަނގަޅު ގޮތް ކަމަށް ގަބޫލުކުރައްވާ ކަމަށް ފަޒުލް ވިދާޅުވިއެވެ.
ފަޒުލް އިތުރަށް ވިދާޅުވީ ރައީސް ޑރ. މުހައްމަދު މުއިއްޒު ވިދާޅުވި ފަދައިން އަމާޒަކީ 5 އަހަރު ތެރޭގައި އެތަނުގައި އާބާދުކުރުން ކަމަށާއި އެ އަމާޒަށް ވާސިލުވުމަށް މަސައްކަތް ކުރަމުންދާ ކަމަށެވެ.
ފުށިދިއްގަރު ފަޅުން 1،153 ހެކްޓަރުގެ ބިން ހިއްކުމަށް ހަމަޖެހިފައި ވާއިރު، އެ މަސައްކަތް 8 މަސް ދުވަހުގެ ތެރޭގައި ނިންމުމަށް ހަމަޖެހިފައިވާ ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ. އަދި މި މަޝްރޫއާއެކު މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލަ އަށް ދާއިމަށް ހައްލު ލިބިގެންދާނެ ކަމަށް އެމަނިކުފާނު ވަނީ ވިދާޅުވެފައެވެ.
ފުށިދިއްގަރުފަޅު ތަރައްގީ ކުރައްވާނީ "ރަސްމާލެ"ގެ ނަމުގައި، ޒީރޯ ކާބަން ސިޓީއެއްގެ ގޮތުގައި ކަމަށް ރައީސް ވަނީ ފާހަގަކުރައްވާފައެވެ. އަދި އެ ސިޓީ ތަރައްގީކުރާނީ "މޯލްޑިވްސް އީކޯ ސިޓީގެ" ގޮތުގައިކަމަށާއި އެ ސިޓީގެ ހުރިހާ ކަމެއް ކުރާނީ އިޔާދަކުރަނިވި ހަކަތަ ބޭނުންކޮށްގެން ކަމަށް ރައީސް ވިދާޅުވެފައިވެއެވެ.
މި މަޝްރޫއަކީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކުންފުންޏާ ހަވާލުކޮށްގެން ކުރިއަށްގެންދާ މަޝްރޫއެކެވެ.
