ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ ގާނޫނީ ހުވާ ކުރެއްވުމާއި، ދިވެހިރާއްޖޭގެ ރައީސުލްޖުމްހޫރިއްޔާގެ ނައިބު ކަމުގެ ގާނޫނީ ހުވާ ކުރެއްވުމުގެ ހާއްސަ ރަސްމިއްޔާތަށް ދައުވަތު އަރުވާފައިވާ ބޭފުޅުން ވަޑައިގަންނަވަން ފަށައިފިއެވެ.
ހުވާ ކުރައްވާ ރަސްމިއްޔާތު ކުރިއަށް ގެންދިއުމަށް ހަމަޖެހިފައިވަނީ ޖުމްހޫރީ މައިދާނުގައި ބާއްވާ ރައްޔިތުންގެ މަޖިލީހުގެ ޖަލްސާގައެވެ. ހުވާ ކުރާ ރަސްމިއްޔާތަށް އެކި ގައުމުތަކުގެ މަންދޫބުންނާއި އިސްވެރިންނަށް ވަނީ ދައުވަތު އަރުވާފައެވެ.
މި ބޭބޭފުޅުންނަށް ރާއްޖޭގެ ފަރާތުން މަރުހަބާ ދެންނެވީ އިންތިހާބީ ރައީސް އޮފީހުގެ އިސް ބޭފުޅުންނާއި ފޮރިން މިނިސްޓްރީގެ އިސް ބޭފުޅުންނެވެ. އާ ސަރުކާރުން އެކުލަވާލާ ވަޒީރުންގެ މަޖިލީހުގެ މެންބަރުން، މަގާމުގެ ގާނޫނީ ހުވާ ކުރެއްވުމާއި، އެބޭފުޅުންނަށް މަގާމުގެ ފަތްކޮޅު ދެއްވުމުގެ ރަސްމިއްޔާތު މިރޭ 7:45 ގައި ރައީސުލްޖުމްހޫރިއްޔާގެ އޮފީހުގައި ބޭއްވުމަށް ވަނީ ހަމަޖެހިފައެވެ.
މީގެ އިތުރުންވެސް ރައީސް އޮފީހުގެ އެންމެ އިސް މަގާމުތަކަށް އައްޔަން ކުރައްވާ ބޭފުޅުންނަށް މަގާމުގެ ފަތްކޮޅު ދެއްވުމަށްވެސް މިރޭ ހަމަޖެހިފައި ވެއެވެ. ރައީސް ކަމުގެ ހުވާ ކުރެއްވުމާއެކު މުއިއްޒު ވެގެންދާނީ ދިވެހި ރާއްޖޭގެ ދެވަނަ ޖުމްހޫރިއްޔާގެ ހަތްވަނަ ރައީސަށެވެ. ފުރަތަމަ ޖުމްހޫރިއްޔާ އާއެކު ގުނާނަމަ އަށްވަނަ ރައީސުލްޖުމްހޫރިއްޔާއެވެ.
މި ރަސްމިއްޔާތުގައި ބޭރު ގައުމުތަކުގެ އިއްޒަތްތެރިން ބައިވެރިވެ ވަޑައިގަންނަވާއިރު މި ހާއްސަ ރަސްމިއްޔާތަށް ޖުމްލަ 22.9 މިލިއަން ރުފިޔާ ހަރަދު ކުރުމަށް ވަނީ ނިންމާފައެވެ.
