"ކުރިން ސްޓްރެސް ވިޔަސް ދެރަވިއަސް ރުޅިއަޔަސް ހިތްހަމަޖައްސާލަން ބަލަނީ ފްރެންޑްސް. އެކަމަކު މިހާރު އެ ބަލާއިރު ކުރެވެނީ ވަރަށް އެހެންކަހަލަ އިހުސާސްތަކެއް،" ޒުވާނަކު ބުންޏެވެ.
ގިނަ ބަޔަކަށް ކަމުދާ ސިޓްކޮމް "ފްރެންސްޑް" ގެ މައިގަނޑު ހަ ކެރެކްޓާތަކުގެ ތެރެއިން އެކަކު ވަކިވެގެން ގޮއްސިއެވެ. މެތިއު ޕެރީ މަރުވެފައި އޮއްވާ ފެނުނީ ލޮސް އޭންގަލަސް ގައި ހުންނަ އޭނާގެ ގޭގެ ޖަކޫޒީގެ ތެރޭގައި އޮއްވައެވެ. މުޅި ދުނިޔޭގެ އެތައް ބައެއްގެ ލޯތަށް ކަރުނައިން ތެތްމާލުމަށްފަހު މެތިއުގެ ވަކިވުން އެންމެން ސިފަކޮށްފައިވަނީ "ގާތް އެކުވެރިއަކު ގެއްލުން" ފަދަ ގޮތަކަށެވެ. ފްރެންޑްސް ގައި މެތިއު ކުޅޭ ކެރެކްޓާ ޗޭންދްލާ ބިންގް އަކީ މުޅި ސިޓްކޮމް އިން ވެސް ގިނަ ބަޔަކަށް އެންމެ ކަމުދާ ކެރެކްޓާއެވެ. ޖޯކު ޖެހުމާއި، މީހުން ހެއްވާލުމުގައި އަރާއި ހުރި "ޗޭންދްލާ" ވަކިވުމުން ހީވަނީ ގާތް މީހަކު ގެއްލިގެން ދިޔަ ހެންނެވެ.
"ކާ ގަޑީގައި ވެސް ފްރެންޑްސް ނޫން އެހެން ސީރީޒެއް ނުބެލޭ. މިހާރުވެސް ހަމަ ބަލަން. އެކަމަކު ބަލަން އިންދާ ކުއްލިއަކަށް ހަނދާނަށް އަންނަނީ މެތިއު މަރުވެއްޖެކަން. ވަގުތުން މުޅި މީހާ މާޔޫސްކޮށްލާ،" އެހެން ޒުވާނަކު ބުންޏެވެ.
1969 ވަނަ އަހަރު އުފަން މެތިއުގެ އެކްޓިން ކެރިއަރު ފެށީ 1979 ވަނަ އަހަރު ޗައިލްޑް އާޓިސްޓްއަކުންނެވެ. އުމުރުން އަހަރުވީތަނާ މައިންބަފައިން ވަރިވުމުން މަންމައާއެކު މެތިއު ދިރިއުޅެމުން ގެންދިޔައެވެ. އުމުރުން 10 އަހަރުވީތަނާ އޭނާގެ އުޅުމަށް ބަދަލުތަކެއް އަންނަ ފެށިއެވެ. ސިނގިރޭޓް ބުއިމާއި ވައްކަން ކުރުމުގެ ސަބަބުން ކިޔެވުން ދަށްވާން ފެށިއެވެ. އޭގެ ފަހުން 14 އަހަރުވީތަނާ ރަލަށް ދެވިހިފައި 18 އަހަރުވަންދެން ގަވައިދުން ކޮންމެ ދުވަހަކު މެތިއު ދިޔައީ ރާ ބޮމުންނެވެ. ރަލުން ސަލާމަތްވުމަށްޓަކައި މެތިއު ކޮންމެ ދުވަހަކު ޓެނިސް ޕްރެކްޓިސް 10 ގަޑިއިރަށް ކުރިއިރު، އޭގެ ނަތީޖާ އަކަށްވީ ކެނެޑާގެ އެންމެ މޮޅު ހަގު ޓެނިސް ކުޅުންތެރިޔަކަށް މެތިއުވުމެވެ. އުމުރުން 15 އަހަރުގައި ބައްޕަ އާއެކު ދިރިއުޅެން ލޮސް އޭންޖަލަސް އަށް ބަދަލުވިއެވެ. އެ ގައުމަށް ގޮސް އެކްޓިން ކުލާސްތަކެއް ނަގައި ކޮމެޑީ ކުލާސްތަކެއް ނަގަން ފެށިއެވެ. އޭނާގެ ކެރިއަރުގެ ބްރޭކްތްރޫ ޕޮއިންޓަކަށްވީ 1994 ވަނަ އަހަރު ދައްކަން ފެށި "ފްރެންޑްސް" އެވެ. އޭނާ ވަނީ އޭނާގެ ހަޔާތުގެ މައްޗަށް ލިޔެފައިވާ ފޮތެއްވެސް ނެރެފައެވެ.
މެތިއު ޕެރީ މަރުވުމާއެކު އެންމެ ހިތާމަކުރި އެއް ބަޔަކީ އޭނާ އާއެކު "ފްރެންޑްސް" ގައި މަސައްކަތް ކުރި ތަރިންނެވެ. އެއީ ޖެނިފާ އެނިސްޓަން، ޑޭވިޑް ޝްވިމާ، ކޯޓްނީ ކޮކްސް، ލީސާ ކޫޑްރޯ އަދި މެޓް ލެބްލަންކްއެވެ. މެތިއު މަރުވުމުން އެ ތަރިން އެކުގައި ވަނީ ޖޮއިންޓް ސްޓޭޓްމަންޓެއްވެސް ނެރެފައެވެ. މެތިއުގެ މަރުން އޭނާގެ ފޭނުން ރޮއްވާލިއިރު އުފާކުރަންވީ، މީހުން ހެއްވާލާ ސްޓްރެސް ފިލުވާލަން ބަލާލެވޭނެ ކަހަލަ މޮޅު ސިޓްކޮމް އެއް މެތިއު ކުޅެދީފައިވާތީއެވެ.
