65،000 ރައްޔިތުންގެ ގެދޮރުވެރިކަމަށް ބޭނުންވާ ބިން އަންނަ އަހަރު ނިމެންވާއިރަށް ހިއްކާ ނިންމަވާނެ ކަމަށް އިންތިހާބީ ރައީސް، ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިހާބު ކާމިޔާބުވުމުން މިރޭ ސޯޝަލް ސެންޓަރުގައި ރައްޔިތުންނާ ބައްދަލު ކުރައްވައި މުއިއްޒު ވިދާޅުވީ ކެމްޕެއިން ތެރޭގައި ވަރަށް ގިނަ ވައުދުތައް ވެވަޑައިގެންނެވި ކަމަށާއި ބައެއް ވައުދުތައް 100 އަދި 200 ފަހަރުވެސް ވެވަޑައިގަންނަވަން ޖެހިވަޑައިގެންނެވި ކަމަށާއި އެއީ ދޮގުތައް ގިނަވުމުން ތަކުރާރުކުރައްވަން ޖެހިވަޑައިގެންނެވި ތެދު ކަމަށެވެ. މުއިއްޒު އެ ފާހަގަކުރެއްވި ވައުދުތަކަކީ ވަޒީފާތަކުގައި ތިބި މީހުން ނުކަނޑާނެ ކަމަށާއި މަޝްރޫއުތައް ނުހުއްޓުވާނެ ކަމުގެ ވައުދެވެ. އެކަން ފާހަގަކުރައްވާ މިރޭވެސް މުއިއްޒު ވަނީ އެ ވައުދުތައް ތަކުރާރު ކުރައްވާފައެވެ.
މުއިއްޒު ވިދާޅުވީ ގެދޮރުވެރިކަން ޔަގީން ކޮށްދިނުމަކީ އެންމެ ބޮޑަށް އިސްކަން ދެއްވި އަދި އެންމެ ބޮޑު ވައުދު ކަމަށާއި މާލެ ސަރަހައްދުގައި ފުށިދިއްގަރުފަޅާއި ގުޅިފަޅާއި ގިރާވަރުފަޅު ހިމެނޭ ގޮތަށް ގާތްގަނޑަކަށް 65،000 ރައްޔިތުންނަށް ގެދޮރުވެރިކަން ޔަގީންވާ ވަރަށް 5 އަހަރުގެ ތެރޭގައި ހިންގާ ބޮޑު މަޝްރޫއުގެ ބިން ހިއްކުން ފެށޭ އަހަރު ނިމުމުގެ ކުރިން އެއްކޮށް ނިންމައި ދެއްވާނެ ކަަމަށެވެ.
މުއިއްޒު ވިދާޅުވީ މިހާރު ދީފައިވާ ގޯތިތައް ހަމަ އެގޮތަށް ދީ އަދި ބައެއް ގޯތިތައް ޖެހޭނީ ދުނިޔެއަށް ގެންނަން ކަމަށާއި އެއީ ކަނޑު އަޑީގައި ހުރީތީ ކަމަށް ވިދާޅުވެފަވެ. ބިން ހިއްކާ ނިމޭއިރު ގޯތި ދުނިޔެއަށް އަންނާނެ ކަަމަށާއި އެ ގެނެސްގެން ގެދޮރުވެރިކަން ޔަގީންކޮށްދެއްވާނެ ކަމަށް ވިދާޅުވިއެވެ. އަދި ހަމައެގޮތަށް ރާއްޖޭގެ ކޮންމެ ރަށެއްގައި ހުރި ކޮންމެ ރައްޔިތަކަށްވެސް ބާކީ ކުރުމެއް ނެތި ހަމަހަމަ ކަމާއެކު ގެދޮރުވެރިކަން ޔަގީން ކޮށްދެއްވާނެ ކަމަށް މުއިއްޒު ވިދާޅުވިއެވެ.
މުއިއްޒު އިތުރަށް ވިދާޅުވީ އުމްރާނީ ތަރައްގީގެ މަޝްރޫއުތައްވެސް ހުންނާނެ ކަމަށާއި އެކަންކަމަށް ރައްޔިތުން ވޯޓު ދިން އިރު ތަފާތު ނުކޮށް އެކަންކަން ކޮށްދެއްވާނެ ކަމަށެވެ.
މުއިއްޒު ވިދާޅުވީ ހުރިހާ ކަމެއް ކުރަން އެކުލަވާލައްވާނީ ހީވާގި ޓީމެއް ކަމަށާއި ކެނބިނެޓުގައި ތިއްބަވާނީ އެ މަސައްކަތް ކުރެވޭ ވަރުގެ ހީވާގި، ތައުލީމާއި ތަޖުރިބާ ހުރި ބޭފުޅުން ކަމަށެވެ. ކުންފުނިތައް ހިންގަވަންވެސް ތިއްބަވާނީ އެފަދަ ބޭފުޅުން ކަމަށާއި ކުންފުނިތައް ވަނީ ބަނގުރޫޓް ވެ 32 ބިލިއަން ރުފިޔާގެ ދަރަންޏަށް އަރާފައި ކަމަށް މުއިއްޒު ވިދާޅުވިއެވެ. އަދި އެ ކުންފުނިތައް ނަގާ ކޮޅަށް ޖެހޭ ވަރުގެ ބޭފުޅުން ކުންފުނިތަކަށް އަންނާނެ ކަމަށް މުއިއްޒު ވަނީ ވިދާޅުވެފައެވެ.
މުއިއްޒު ވިދާޅުވީ ވައުދުވެވަޑައިގެންނެވި ގޮތަށް ކަންކަން ކުރެވޭ ވަރުގެ ހީވާގި ޓީމެއް ފެނިގެންދާނެ ކަމަށާއި މި ސަރުކާރުގައި ހެން އެހެން ބައެއްގެ އަތުގައި ބާރު އޮންނަ ސަރުކާރަކަށް ނުވާނެ ކަމަށެވެ. އަދި މުއިއްޒުގެ މައްޗަށް ބާރު ހިނގާނީ ހަމައެކަނި ރައްޔިތުންގެ ކަމަށާއި އިންތިހާބު ކުރީ ރައްޔިތުން ކަމަށް ވިދާޅުވިއެވެ.
