ރާއްޖޭގެ އިގްތިސޯދީ ހާލަތު ރަނގަޅުކޮށް ކޮޅަށް ޖެހުމަށްޓަކައި ލޯންތައް ރިފައިނޭންސް ކުރުމާއި، އެސްޑީއެފް އަށް ޑޮލަރު ޖަމާކު ކުރެއްވުމަކީ މުހިންމު 2 ކަންތައްކަމަށް އިދިކޮޅު ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިފަދައިން ވިދާޅުވީ މިރޭ މީރުމާގައި ބޭއްވި "އިގްތިސޯދީ މެނިފެސްޓޯ" ލޯންޗުކުރުމުގެ ހަފްލާގައެވެ.
މުއިއްޒު ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި އުފެއްދި ސޮވެރިން ޑިވެލޮޕްމަންޓް ފަންޑް (އެސްޑީއެފް) ގައި ހުރި ޑޮލަރު މި ސަރުކާރުން ނަގާ އެއަށް ރުފިޔާ ލުމަށްފަހު އެ ރުފިޔާވެސް ބޭނުން ކުރަމުން ގެންދާ ކަމަށެވެ. އަދި ގާނޫނެއް ހަދައިގެން ގާނޫނީ ބާރުވެރިކަމާއެކު އެސްޑީއެފް ހިމާޔަތް ކޮށް، އެއާޕޯޓަށް ލިބޭ ޑޮލަރާއި ޓޫރިޒަމަށް ލިބޭ ޑޮލަރު އިތުރު ކޮށް އެސްޑީއެފްއަކީ މަހުން މަހަށް އާމްދަނީ ޖަމާވާ ފަންޑަކަށް ހައްދަވައި ދެއްވާނެ ކަމަށް ވެސް ވިދާޅުވިއެވެ. އެސްޑީއެފްއަކީ ހާއްސަކޮށް ލޯނު ދެއްކުމަށް 2015 ވަނަ އަހަރު ތައާރަފު ކުރި ސޭވިން ފަންޑެކެވެ. 2018 ނިމުނު އިރު އެ ފްންޑުގައި 250 މިލިއަން ޑޮލަރު ހުއްޓެވެ.
މުއިއްޒު ވިދާޅުވީ އޭރުން ރިޒާމް ކުރެވިފައި ހުންނާނީ ޑޮލަރު ކަމަށާއި 2026 އާ ހަމައަށް ދާންވާއިރަށް ދަރަނި މެނޭޖް ކޮށް، ރާއްޖޭގެ ކްރެޑިޓް ރޭޓިން 2016 ގައި ހުރި ހިސާބަށް ގެންދަން ބޭނުންވެ ވަޑައިގަންނަވާ ކަމަށާއި އަމާޒަކީ އެ ހިސާބަށް ދެވުން ކަމަށެވެ. އަދި ދަރަނި ދެއްކުމަށް ކްރެޑިޓް ރޭޑް މަތިކޮށް، އިންވެސްޓާ ކޮންފިޑެންސް އަނބުރާ ހޯދާ، ލޯނުތައް ރީފައިނޭންސް ކުރެވިގެން ދިއުމުން ލޯނު ދެއްކުމުގައި އުނދަގުލެއް ނުވާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ އެސްޑީއެފް ވަރުގަަކޮށް އެއަށް ޑޮލަރު ޖަމާ ކުރަން ފެށުމުން އެކި އެކި ގޮތްގޮތުން ފުރުސަތު ހުޅުވިގެންދާނެ ކަމަށެވެ. މުއިއްޒު އިޝާރާތް ކުރެއްވި އެ ފުރުސަތުތަކުގެ ތެރެއިން އެއް ފުރުސަތަކީ އެ ފަންޑުން ބޭރުގެ މާލީ އިންތިޒާމުތަކުގެ ތެރޭގައި އިންވެސްޓް ކުރުމަށް ރައީސް ޔާމީންގެ ވެރިކަމުގައި ގެންގުޅުނު ސިޔާސަތަށް އިޝާރާތް ކުރައްވާ ވިދާޅުވި ވާހަކައެއް ކަމަށް ގަބޫލު ކުރެއެވެ.
މުއިއްޒު މިރޭ އިތުރަށް ވިދާޅުވީ، މަސްވެރިކަމުގެ ދާއިރާ ހަރުދަނާކުރުމަށް ކޯލްޑް ސްޓޯރޭޖް ފެސިލިޓީ އިތުރުކުރުމާއި މަސް ގަނެ، ރައްކާ ކުރުމާއެކު ދަޅުގައި ބަންދުކޮށްގެން ފައިނަލް ޕްރޮޑަކްޓް، ރާއްޖެއިން ބޭރަށް ފޮނުވޭ މިންވަރު އިތުރުކުރުން ހިމެނޭ ކަމަށާއި އެއީ ފުޅާކުރަން ޖެހޭ އިންޑަސްޓްރީއެއް ކަމަށެވެ.
މުއިއްޒު ވިދާޅުވީ އަމާޒަކީ ގަންނަ ހުރިހާ މަހެއް ދަޅުގައި ބަންދު ކުރެވޭ ގޮތް ހެދުން ކަމަށާއި އެއް ފަހަރުން އެ ހިސާބަށް ނުދެވުނު ނަމަވެސް އެ އަދަދު ބޮޑުތަނުން އިތުރު ކުރުން ކަމަށެވެ. އަދި ޓޫރިޒަމް ދާއިރާއާ އެއްވަރަށް ނުވަތަ އެއަށްވުރެ މައްޗަށްވެސް އެ ދާއިރާ ފުޅާކުރެވިއްޖެނަމަ ދައުލަތަށް ލިބޭ އާމްދަނީ އިތުރުވެގެންދާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ މަސްވެރިކަމަށް މިހާރު ބޭނުން ކުރާ ދޯނިތަކަށް ވުރެ ބޮޑެތި ދޯނި ބަނުމަށް ކުދި ލުނި ލޯނު ލިބޭނެ ގޮތް ހައްދަވައި ދެއްވާނެ ކަމަށާއި ބޮޑެތި ދޯނިތައް ބަނދަގެން އީއީޒެޑްގެ ތެރެއިން ފުރިހަމަ ނަފާ ހޯދައި އާމްދަނީ އިތުރުކުރުމުގެ ފުރުސަތު އެބަ އޮތް ކަމަށެވެ. އަދި އެކަން ކުރަން ވަރަށް މަސައްކަތް ކުރަން ޖެހޭނެ ކަމަށާއި އެހެންނަމަވެސް އެއީ ކުރެވިދާނެ ކަމެއް ކަމަށް މުއިއްޒު ވަނީ ވިދާޅުވެފައެވެ. އިތުރަށް އޭނާ ވިދާޅުވީ، ޓޫރިޒަމް ޕްރޮމޯޓްކުރުމަށް އެމްއެމްޕީއާރްސީ އޮންނަ ފަދައިން އެފަދަ ބޯޑެއް މަސްވެރިކަން އުފައްދާ އެ މަސައްކަތް ކުރައްވާނެ ކަމަށެވެ.
މުއިއްޒު ވިދާޅުވީ މީހުން ދިރިއުޅޭ ރަށްތަކާއި ދިރިނޫޅޭ ރަށްތައް ދަނޑުވެރިކަމަށް ކަނޑައަޅުއްވާނެ ކަމަށާއި އޭގެ އެއް ބޭނުމަކީ ރާއްޖޭގައި އާންމުކޮށް އުފައްދާ ބާވަތްތަކުން ރާއްޖެއަށް، ފުޑް ސެކިއުރިޓީ ހޯއްދަވައި ދެއްވުން ކަމަށެވެ. އެގޮތަށް އެތަކެތި ގެންނަން އިމްޕޯޓަށް ކުރާ ހަރަދު ސަލާމަތް ކުރުމަކީ މުއިއްޒުގެ އަމާޒު ކަމުގައި ވަނީ ފާހަގަ ކުރައްވާފއެވެ.
މުއިއްޒު ވިދާޅުވީ ރާއްޖެއިން ބޭރުވާ ޑޮލަރުގެ މަދުކުރެވި ރާއްޖެއިން އުފައްދާ އެއްޗެހިން ފުއްދޭނަމަ އެއީ އިގްތިސޯދަށް ލިބޭ ފައިދާ ކުރިއެރައިގެން ދާނެ ކަމެއް ކަމަށެވެ. އަދި ދަނޑުވެރިކަމުގެ ދާއިރާއަށް ބޮޑު އިސްކަމެއް ދެއްވާނެ ކަމަށާއި އެ ދާއިރާއަށް ވަންނަން ބޭނުންވާ ފަރާތްތަކަށްވެސް ލުއި ގޮތަކަށް ވަދެ އިންވެސްޓް ކުރާނެ ފުރުސަތުތައް ހުޅުވައިދެއްވާނެ ކަމަށެވެ.
މުއިއްޒުގެ އަމާޒުތައް:
- ޖީޑީޕީ 2028 ވަނަ އަހަރާ ހިސާބަށް ދާންވާއިރު 150 ބިލިއަން ރުފިޔާއަށް އެރުވުން.
- މަސްވެރިކަން ކުރިއަރުވާ ރާއްޖެއިން ބޭރަށް އެކްސްޕޯޓްކޮށް ރެވެނިއު 110 ޕަސެންޓާ ހަމައަށް އިތުރުކުރުން.
- ސްޓޯރޭޖް ކެޕޭސިޓީ އިތުރުކުރުން.
- ފޮރިން ޑިރެކްޓް އިންވެސްޓްމެންޓް (އެފްޑީއައި)ގެ ގޮތުގައި ޓޫރިޒަމްގެ ނަފާ 5 އަހަރުގެ ތެރޭގައި 4 ބިލިއަން ޑޮލަރަށް އެރުވުން.
- ޔޫސަބަލް ރިސާވް 500 މިލިއަން ޑޮލަރާ ހަމައަށް ގެންދިއުން.
- އެސްޑީއެފް އަދި ޕެންޝަން ފަންޑުވެސް ހިމެނޭ ގޮތަށް އެސްޑީއެފްގެ ޑިޕޮސިޓް 500 މިލިއަން ޑޮލަރާ ހިސާބަށް މަތިކުރުން.
- ޕެންޝަން ފަންޑުގައި ހުރި ފައިސާއިން 75 މިލިއަން ޑޮލަރު އިންވެސްޓްކޮށް 5 އަހަރު ތެރޭގައި ފައިދާ ހޯދުން.
- އެސްއީޒެޑް ގާނޫނަށް ފުރިހަމައަށް އަމަލުކޮށް އިންވެސްޓްމަންޓްތައް ގެނެސް މަދުވެގެން 1 ބިލިއަން ޑޮަލަރުގެ އާމްދަނީއެއް ހޯދުން.
- ފިސްކަލް ރެސްޕޮންސިބިލިޓީ ގާނޫނުގައި ހިފަހައްޓާފައި އޮތް މާއްދާ އަލުން ގެނެސް ފައިސާ ޗާޕް ކުރުން ހުއްޓާލުން.
- ބޮލަކަށް ޖެހޭ އާމްދަނީގެ ނިސްބަތް 17000 އެއްހާ ޑޮލަރަށް ހެދުން.
މުއިއްޒު ވިދާޅުވީ އެކަންކަން ކުރައްވައި ރާއްޖޭގެ އިގްތިސޯދު ނަގާ ކޮޅަށް ޖަހާ ރައްޔިތުންނަށް ފުދުންތެރި ދިރިއުޅުމެއް ހޯއްދަވައި ދެއްވޭނެ ކަމަށެވެ.
