ދިވެހިރާއްޖެއަކީ އެއްވެސް ބައެއްގެ "ބެކްޔާޑެއް" ކަމަށް ދެކޭ ދެކުމާ ދެކޮޅު ހަދާ ކަމަށާއި، ރާއްޖޭގެ ސިޔާދަތާއި މިނިވަންކަމަށް ޗައިނާއިން ފުރިހަމައަށް އިހުތިރާމު ކުރާ ކަމަށް ޗައިނާ ސަރުކާރުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ކޮންގ ޝިންހުއާ ވިދާޅުވެއްޖެއެވެ.
"ދަ ޕްރެސް" އަށް ދެއްވި ހާއްސަ އިންޓަވިއުއެއްގައި ޗައިނާގެ ސަފީރު މިހެން ވިދާޅުވީ، އިންޑިއާ ކަނޑުގައި ރާއްޖެ އޮތް ސްޓްރެޓީޖިކް މުހިންމު ސަރަހައްދާއި، ޗައިނާ އަދި އިންޑިއާއާ ދެމެދު އޮތް ކަމަށް ބުނާ ޖިއޯޕޮލިޓިކަލް ވާދަވެރިކަމާ ގުޅޭގޮތުން ކުރެވުނު ސުވާލަކަށް ޖަވާބު ދެއްވަމުންނެވެ.
ސަފީރު ވިދާޅުވީ، ގައުމުތަކުގެ ގުޅުންތަކަކީ ސަރަހައްދީ ސިޔާސީ ވާދަވެރިކަމުގެ މައްޗަށް ބިނާވެފައިވާ ގުޅުމަކަށް ވެގެން ނުވާނެ ކަމަށް ޗައިނާއިން ގަބޫލުކުރާ ކަމަށެވެ. އަދި ޗައިނާ-ރާއްޖޭގެ ގުޅުމާއި، ދެ ގައުމުގެ ދެމެދުގައި އޮތް އެއްބާރުލުމުގެ ފުރުސަތުތައް ރަނގަޅަށް ދެނެގަނެވޭނީ މިފަދަ ހަނި ވިސްނުންތަކުން ބޭރުވެގެން ކަމަށްވެސް އެމަނިކުފާނު ފާހަގަކުރެއްވިއެވެ.
ރާއްޖެއަކީ ވަކި ބައެއްގެ ސިޔާސީ ނުފޫޒުގެ ދަށުގައި އޮންނަންޖެހޭ ތަނެއްގެ ގޮތުގައި ބެލުމާ ދެކޮޅަށް ވާހަކަދައްކަވަމުން ސަފީރު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ "މޯލްޑިވްސް ފަސްޓް" ނުވަތަ "ދިވެހިރާއްޖެ އިސްކުރުމުގެ" ސިޔާސަތަށް ޗައިނާއިން ވަރަށް ބޮޑަށް މަރުހަބާ ކިޔާ ކަމަށެވެ. އަދި ރާއްޖެއަކީ އެއްވެސް ބައެއްގެ ބެކްޔާޑް ކަމަށް ދެކޭ ދެކުމާ ޗައިނާއިން ދެކޮޅު ހަދާ ކަމަށާއި، ރާއްޖޭގެ ސިޔާދަތާއި، މިނިވަންކަމާއި، ސަރަހައްދީ ފުރިހަމަކަން ދެމެހެއްޓުމަށް ދިވެހި ސަރުކާރާއި ރައްޔިތުން ކުރާ މަސައްކަތްތަކަށް ޗައިނާއިން އަބަދުވެސް އެއްބާރުލުން ދޭނެ ކަމަށް ވިދާޅުވިއެވެ.
ސަފީރު އިތުރަށް ވިދާޅުވީ، ދުނިޔެ ތަރައްގީ ވާންވާނީ އެންމެންގެ ބައިވެރިވުން އޮންނަ އަދި އެންމެންނަށް ފައިދާވާ ގޮތަށް ކަމަށާއި، ގައުމުތަކުގެ މެދުގައި އޮންނަންވާނީ އެއްބާރުލުން ކަމަށެވެ. އެގޮތުން އެމެރިކާ ފަދަ ބޮޑެތި ބާރުތަކާއެކު ވެސް ބިނާކުރަނިވި ގުޅުމެއް ބޭއްވުމަށް ޗައިނާ އޮތީ ތައްޔާރަށް ކަމަށް ފާހަގަކުރެއްވިއެވެ. ޗައިނާގެ ތާރީހުގައި ތަހައްމަލުކުރަން ޖެހުނު އިސްތިއުމާރީ އަދި ބޭރުގެ ނުފޫޒުތަކުގެ ހިތި ތަޖުރިބާގެ ސަބަބުން، ގައުމެއްގެ މިނިވަންކަމާއި ސިޔާދަތުގެ އަގު ޗައިނާގެ ރައްޔިތުންނަށް ވަރަށް ރަނގަޅަށް އިހުސާސްވާ ކަމަށްވެސް އޭނާ ވިދާޅުވިއެވެ.
ރާއްޖެއާއެކު އޮތް ދުރު ރާސްތާގެ ތަރައްގީގެ ގުޅުމާ ބެހޭގޮތުން ވާހަކަދައްކަވަމުން ސަފީރު ވިދާޅުވީ، ރާއްޖެއަކީ ޗައިނާގެ މުހިންމު ތަރައްގީގެ ބައިވެރިއެއް ކަމަށާއި، "ބެލްޓް އެންޑް ރޯޑް އިނީޝިއޭޓިވް" ގެ ދަށުން ގިނަ މަސައްކަތްތަކެއް ކުރެވެމުންދާ ކަމަށެވެ. އަދި މި ގުޅުމަކީ ހަމައެކަނި އުމްރާނީ ތަރައްގީގެ މަޝްރޫއުތަކަށް އެކަނި އޮތް ގުޅުމެއް ނޫން ކަމަށާއި، އިއާދަކުރަނިވި ހަކަތައާއި، ޒަމާނީ މަސްވެރިކަމާއި ދަނޑުވެރިކަން އަދި ޑިޖިޓަލް އިގްތިސާދުގެ ދާއިރާއިން ވެސް މަޝްވަރާތައް ކުރިއަށްދާ ކަމަށް ވިދާޅުވިއެވެ.
ސަފީރުގެ ވާހަކަފުޅު ނިންމަވާލައްވަމުން ވިދާޅުވީ، ޓެކްނޮލޮޖީއާއި އިލްމު ހިއްސާކުރުމުގެ ތެރެއިން ރާއްޖެއާއި ޗައިނާއާ ދެމެދު "އިންވިޒިބަލް ބްރިޖެއް" ބިނާކުރަން ޗައިނާއިން އެދޭ ކަމަށެވެ. މީގެ ސަބަބުން ރާއްޖެއަށް އަމިއްލަ ފައިމައްޗަށް ތެދުވެ، އަމިއްލަ ހާލަތާ ގުޅޭގޮތުން ތަރައްގީގެ އާ އުސްމިންތަކަކަށް ވާސިލުވުމުގެ ގާބިލުކަން އިތުރުވެގެންދާނެ ކަމަށް އެމަނިކުފާނު ވިދާޅުވިއެވެ.
