ރިޔާސީ އިންތިހާބުގެ ދެވަނަ ބުރުގައި ވޯޓުލުމަށް ބަހައްޓާ ބޫތުތަކުގެ ޑިޒައިނަށް ބަދަލު ގެނެސްފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
ރިޔާސީ އިންތިހާބުގެ ފުރަތަމަ ބުރުގައި ވޯޓުލާ ބޫތުތައް ބަހައްޓާފައިހުރި ގޮތާމެދު ގިނަ ޝަކުވާތައް ލިބިފައިވާކަމަށް އީސީން ބުނެއެވެ. އިންތިހާބުގެ ފުރަތަމަ ބުރުގައި ބޫތު ބަހައްޓާފައި ވަނީ ވޯޓުލާ މީހާގެ ހަރަކާތްތައް އޮބްޒާވަރުންނާއި މޮނީޓަރުންނަށް ފެންނަ ގޮތަށެވެ. އެކަމާ ގުޅިގެން ވޯޓު ސިއްރު ވުމާމެދު ބައެއް ފަރާތްތަކުން ވަނީ ސުވާލު އުފައްދާފައެވެ.
މި ޝަކުވާތަކާ ގުޅިގެން އީސީ އިން ވަނީ އިންތިހާބުގެ ދެވަނަ ބުރުގައި ވޯޓުލާ ބޫތުގެ ޑިޒައިންއަށް ބަދަލުތަކެއް ގެނެސްފައެވެ. އީސީ އިން ބުނީ އިންތިހާބުގެ ދެވަނަ ބުރުގައި ބޭނުންކުރާ ބޫތުތަކުގެ އެންމެ ތިރިން ބައެއް ކަނޑާލުމަށްފަހު ދެ އަަރިމަތިން ބޮޑަށް ނިވާ ވާ ގޮތައް ހަދާފައިވާނެ ކަމަށެވެ. މިހެން ހެދުމުން ވޯޓުލާ މީހާއަށް ބޫތުގެ ތެރެއަށް ކޮންމެވެސް ވަރަކަށް ވަދެވޭނެކަން ފާހަގަ ކުރަމުން އީސީ އިން ބުނީ މި ގެނައި ބަދަލާއެކުވެސް ބޫތުތައް ބަހައްޓާނީ ވޯޓުލާ މީހާގެ ހަރަކާތްތައް އޮބްޒާވަރުންނާ އަދި މޮނީޓަރުންނަށް ފެންނަ ގޮތަށް ކަމަށެވެ.
ރިޔާސީ އިންތިހާބުުގެ ފުރަތަމަ ބުރުގައި ޖުމްލަ 574 ވޯޓުފޮށި ބަހައްޓާފައި ވާއިރު އޭގެ ތެރެއިން 176 ފޮށި ބަހައްޓާފައި ވަނީ މާލެ ސަރަހައްދުގައެވެ. އަދި އަތޮޅުތެރޭގެ ރަށްތަކުގައި 319 ފޮށި ބަހައްޓާފައިވާއިރު ރިސޯޓުތަކުގައި 65 ފޮށި ވަނީ ބަހައްޓާފައެވެ. މީގެ އިތުރުން ރާއްޖެއިން ބޭރުގައި 8 ފޮށި، އަދި ޖަލުތަކާއި ސިނާއި ރަށްރަށުގައި 6 ފޮށި ވަނީ ބަހައްޓާފައެވެ.
