ހައުސިން މިނިސްޓްރީ މެދުވެރިކޮށް ގޯތީގެ ރަޖިސްޓްރީ ހަދައިދެވޭ ގޮތަށް، 'ބަންޑާރަ ގޯއްޗާއި އަމިއްލަ ގޯތި އަދި އެފަދަ ގޯތީގައި ހަދާ އިމާރާތް ރަޖިސްޓްރީ ކުރުމުގެ ގަވައިދަ' އަށް އިސްލާހު ގެނެސްފިއެވެ.
މީގެ ކުރިން ގޯތީގެ ރަޖިސްޓްރީ ހަދައިދެނީ ސިޓީ ކައުންސިލުން ނުވަތަ ރަށު ކައުންސިލުން އެކަންޏެވެ.
އެހެންނަމަވެސް ހައުސިން މިނިސްޓްރީން އިސްލާހުކޮށް މިއަދު އާންމުކޮށްފައިވާ ގަވައިދުގައިވާ ގޮތުން ސަރުކާރުން ވަކި ސަރަހައްދެއް ތަރައްގީ ކުރުމަށް ކުރިއަށް ގެންދާ ގޯތި ދިނުމުގެ މަޝްރޫއުތަކުގެ ދަށުން ގޯތި ހަވާލު ކުރާއިރު ގޯތީގެ ދާއިމީ ރަޖިސްޓްރީ ގޯތި ލިބޭ ފަރާތަށް ދޫކުރަން ޖެހެެއެވެ. އަދި އެ ގަވައިދުގައިވާ ގޮތުން އެ ރަޖިސްޓްރީ ދޫކުރުމުން، އަލުން އެ ބިން ރަޖިސްޓްރީ ކުރަން ހުށަހަޅަަކަށް ނުޖެހޭނެއެވެ.
މީގެ އިތުރުން އެ ގަވައިދުގައި ވަނީ ސަރުކާރުން ގޯތި ދިނުމަށް ކަނޑައަޅާ ސަރަހައްދަކީ ނުހިއްކާ ނުވަތަ އިން ވަކި ނުކޮށް އޮތް ސަރަހައްދެއް ނަމަ އެފަދަ ސަރަހައްދަކުން ގޯތި ހަވާލު ކުރާއިރު ގޯތި ދޫކުރިކަމުގެ ލިޔުމެއް ގޯތިލިބުނު ފަރާތްތަކަށް ދޭނެ ކަމަށެވެ.
ހައުސިން މިނިސްޓްރީން މި ގަވައިދަށް އިސްލާހު ގެނެސްފައި ވާއިރު އެ މިނިސްޓްރީން ގެންދަނީ "ބިންވެރިޔާ ސްކީމް" ގެ ދަށުން ގޯތި ލިބުނު މީހުންނަށް ރަޖިސްޓްރީ ހަވާލުކުރުމުގެ މަސައްކަތް ކުރަމުންނެވެ.
