އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހްގެ ކެމްޕެއިން ދަތުރުފުޅާ ދިމާކޮށް، ރ. މަޑުއްވަރީގެ އިދިކޮޅު ސަޕޯޓަރުންގެ ޝުއޫރުފާޅުކޮށް އިހުތިޖާޖު ކޮށްފިއެވެ.
ރަށުގެ ބަނދަރު ސަރަހައްދަށް އެއްވެ އިދިކޮޅު ފަރާތްތަކުން އިހްތިޖާޖު ކުރި ފަރާތްތަކުގެ ތެރޭގައި މަޑުއްވަރީ ކައުންސިލްގެ ރައީސް މުހައްމަދު ސޯދިގް ވެސް ހިމެނެއެވެ.
އިހުތިޖާޖު ކުރި ފަރާތްތަކުގެ ޝަކުވާތަކުގެ ތެރޭގައި ޝުއޫރުފާޅުކޮށް އެ ފަރާތްތަކުން ދެމި ބެނޭތައް ފުލުހުން ނެގުމުގެ އިތުރުން އެ ރަށުގެ މަސްވެރިން މަސް ކިރަން ފެލިވަރަށް ގޮސް މަސް ނުކިރި ސަލާން ޖަހަން ޖެހޭ މައްސަލަ ހިމެނެއެވެ. އެގޮތުން އިހުތިޖާޖުގެ ބައިވެރިން ވަނީ މަސްވެރިންނަށް އެހެން ނުހެދުމަށް ގޮވާލާފައެވެ.
މީގެ އިތުރުން އެ ފަރާތްތަކުން ދަނީ ޕީޕީއެމްގެ ރައީސް އަބްދުﷲ ޔާމީން މިނިވަން ކުރަން ގޮވާލާ ވެސް އަޑުއުފުލަމުންނެވެ. އަދި އެއްވެފައިވާ ފަރާތްތަކުގެ ތެރެއިން ބައެއް މީހުން ގަޔަށް ކޮތަޅު ލައިގެން ތިބި އިރު ކޮތަޅަކުން 2ރ ނަގާތީ ވެސް އެ ފަރާތްތަކުން ވަނީ އެކަމާ ނުހުރުން ފާޅުކޮށްފައެވެ.
ލިޓަސް ސާވިސް ސެންޓަރު ތެރޭގައި ތޫނު އެއްޗަކުން ހަމަލާދީ ޖުލައި 31، 2018 ގައި މަރާލާފައިވާ ރ. މީދޫ ފެންފިޔާޒުގޭ މުހައްމަދު އަނަސްގެ މަރަށް އިންސާފު ލިބިފައި ނުވާތީ ރައީސް ސޯލިހް ރ. މީދޫއަށް ކުރެއްވި ދަތުރުފުޅާ ދިމާކޮށް އެ ރަށުގެ ރައްޔިތުން ވެސް ވަނީ މިއަދު އިހުތިޖާޖު ކޮށްފައެވެ.
