ވ. އަތޮޅުގައި ޕިކްނިކް އައިލެންޑަކަށް ވ. ހުޅިދޫ ހަދަން ރައީސް އިބްރާހިމް މުހައްމަދު ސޯލިހަށް ދަންނަވަން ކައުސިލްގެ އަޣްލަބިއްޔަތުން ފާސްކޮށްފިއެވެ.
ވ އަތޮޅު ކައުންސިލުން ބުނީ، އެ އަތޮޅުގައި ޕިކްނިކް އައިލެންޑް ހަދާނެ ރަށެއް އަތޮޅުގެ މެޖޯރިޓީން ނިންމަން ރައީސް އެދިވަޑައިގެންފައިވާ ގޮތަށް ހުޅުދޫ އަކީ އެރަށް ކަމުގައި ކައުންސިލުން ނިންމައިފި ކަމަށެވެ.
އެހެން ކަމުން ވ އަތޮޅު ރައްޔިތުންގެ ބޭނުމަށް ޕިކްނިކް އައިލެންޑުގެ ގޮތުގައި ހުޅިދޫ ކަނޑައަޅައި ދެއްވުމަށް ރައީސް ސޯލިހު ގެ އަރިހުން އެދުމަށް އެ އަތޮޅު، އަތޮޅު ކައުންސިލްގެ 4 ވަނަ ދައުރުގެ 30 ވަނަ އާންމު ޖަލްސާގައި ބައިވެރިވެ ވަޑައިގެންނެވި 4 މެންބަރުންގެ ތެރެއިން 3 މެންބަރުންގެ ވޯޓުން ފާސްކޮށްފި ކަމަށެވެ.
މިނިންމުން ރައީސް ސޯލިހަށް ދެންނެވުމަށް ރައީސް ސޯލިހުގެ ރަނިން މޭޓު، ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އާ ހިއްސާ ކޮށްފައިވާ ކަމަށް ވެސް ކައުންސިލުން ވަނީ ބުނެފައެވެ.
ވ. އަތޮޅު ރައްޔިތުން ދަތުރުދިޔުމަށް ހާއްސަ ރަށެއް ހަމަޖައްސައި އެ ރަށް ތަރައްގީ ކޮށްދެއްވާނެ ކަމަށް، 2018 ވަނަ އަހަރުގެ ރިޔާސީ އިންތިހާބުގެ ދުވަސްވަރު ވ. ކެޔޮދޫގައި ބޭއްވި ބައްދަލުވުމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވަނީ އިއުލާން ކުރައްވާފައެވެ.
އެކަމާ ގުޅިގެން މީގެ ކުރިން ފެލިދެއަތޮޅު އަތޮޅު ކައުންސިލްގެ ރައީސް ޝުޖާއު އަލީ ސޮއިކުރައްވާ ރައީސް ސޯލިހަށް ފޮނުއްވި ސިޓީގައި ބުނީ، އަތޮޅުގެ ރައްޔިތުންގެ އެންމެބޮޑު އެއް ކަންބޮޑުވުމަކަށް ވެފައިވާ، ދަތުރުދާނެ ހާއްސަ ރަށެއް ނެތުމުގެ މައްސަލަ ހައްލުކޮށްދެއްވުމަށް، ރަށެއް ހަމަޖައްސައިދެއްވާނެ ކަން އިއުލާން ކޮށްދެއްވުން ވެގެން ގޮސްފައި ވަނީ މުޅި އަތޮޅަށް ހިނިތުންވުން ގެނެސްދިން ކަމަކަށެވެ.
ވ. އަތޮޅު ކައުންސިލުން އޭރު ވަނީ ވ. އަތޮޅު ތަރައްގީގެ ޕްލޭންގެ މަސައްކަތް ކުރުމަށް، ރައްޔިތުންނާ މަޝްވަރާ ކުރުމަށް ކުރި ދަތުރުތަކުގައި ބޭއްވި މަޝްވަރާ ބައްދަލުވުންތަކުގައި، އަތޮޅުގެ ފަޅު ރަށްތަކާއި، ފަޅުތަކާއި، އަދި މިނޫންވެސް އެންމެހައި ގުދުރަތީ ވާސީލަތްތައް ބޭނުން ކުރަމުން އަންނަގޮތާ މެދު ރައްޔިތުންގެ ހުރި ކަންބޮޑުވުންތަކާއި، ޝަކުވާތައް ފާޅުކޮށްފައިވާ ކަމަށް ބުނެފައެވެ.
އަދި ކަނޑައެޅިފައިވާ އެއްވެސް މިންގަނޑެއް ނެތި ބޭނުން މިންވަރަކަށް ވިޔަފާރި ތަކުން ވ. އަތޮޅުގެ ރަށްތައް ބޭނުން ކުރަމުން ދާއިރު، މިހާރު މި ވަސީލަތްތަކަކީ އަތޮޅުގެ ރައްޔިތުން އެ ވަސީލަތްތަކުގެ ބޭނުން ހިފުމުން މަހުރޫމުވެ، މަނާކޮށްފައިވާ ތަންތަންކަމާއި، އަދި މިފަދަ ތަންތަން މާދުރު ހިލޭ ބަޔަކަށް ވިއްކާލާ، ނުއަގުގައި ދޫކުކޮށްފައިވާ ކަން ވަނީ ފާހަގަ ކޮށްފައެވެ. އަދި އަތޮޅުގެ ރައްޔިތުންގެ ކުރިއެރުމާއި މުސްތަގްބަލަށް މިފަދަ ކަންތައްތަކުގެ ސަބަބުން ގެއްލުންވަމުން ދާކަމުގެ ޝަކުވާއާއި ކަންބޮޑުވުންތައް އިންތިހާއަށް ހުރިކަން ވ. އަތޮޅު ކައުންސިލުން ވަނީ ފާހަގަ ކޮށްފައެވެ.
ހާއްސަކޮށް، އަތޮޅުގައި ދަތުރު ދިޔުމަށް ހާއްސަ ރަށެއް އޮތުން އިންތިހާއަށް މުހިއްމު ވެފައިވާކަން އަތޮޅު ރައްޔިތުން ފާހަގަ ކޮށްފައި ވާކަންވެސް ވ. އަތޮޅު ކައުންސިލުން ވަނީ ބުނެފައެވެ.
