ކުރިއަށް އޮތް ރިޔާސީ އިންތިހާބު އިންސާފުވެރިކޮށް ކުރިއަށް ގެންދިއުމަށް، 11 އަހަރުގެ ޖަލު ހުކުމެއް އިއްވާފައިވާ ކުރީގެ ރައީސް އަބްދުﷲ ޔާމީން ގެއަށް ބަދަލުކޮށްދެއްވުމަށް އެހީވެދިނުމަށް އެދި ޔޫރޮޕިއަން ޔޫނިއަން (އީޔޫ)ގެ އެހީއަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެދިވަޑައިގެންފިއެވެ.
ރިޔާސީ އިންތިހާބު ހިނގާގޮތް ބެއްލެވުމަށްޓަަކައި އީޔޫއިން ރާއްޖެ ފޮނުވާފައިވާ ކޯ-ޓީމުގެ ޗީފް އޮބްޒާވަރު އަދި ޔޫރަޕިއަން ޕާލަމެންޓުގެ މެންބަރު، ނާޗޯ ސަންޗެޒް އަމޯރް ވަނީ މިއަދު ރައީސް ނަޝީދުގެ އަރިހަށް އިހްތިރާމްގެ ޒިޔާރަތެއް ކުރައްވާފައެވެ.
މި ޒިޔާރަތާ ގުޅިގެން މަޖިލީހުގެ އިދާރާއިން ބުނީ އިންސާފުވެރި އަދި މިނިވަން އިންތިހާބެއް ބޭއްވުމަށްޓަކައި ޔާމީން ގެއަށް ބަދަލުކޮށްދިނުމަށް އެހީތެރިވުމަށް އީޔޫގެ އޮބްޒާވަރުންގެ އަރިހުން ނަޝީދު އެދިވަޑައިގެންނެވި ކަމަށެެވެ. ނަމަވެސް މިކަމާ ގުޅޭ އިތުރު ތަފްސީލެއް އެ އިދާރާއިން ދީފައެއް ނުވެއެވެ.
މި ބައްދަލުވުމުގައި ނަޝީދުގެ އިތުރުން މަޖިލީހުގެ އަމީންއާންމާއި ކައުންސެލް ޖެނެރަލްގެ އިތުރުން މަޑުއްވަރީ ދާއިރާގެ މެންބަރު އާދަމް ޝަރީފާއި މެދުހެންވޭރު ދާއިރާގެ މެންބަރު އަލީ އާޒިމް ވަނީ ބައިވެރި ވެވަޑައިގެންފައެވެ.
ޔާމީން މިނިވަން ކުރުމަށް ރައީސް ނަޝީދު އީޔޫގެ އެހީއަށް މިއަދު އެދިވަޑައިގެންފައި ވާއިރު މީގެ ކުރިން އެމަނިކުފާނު ވަނީ ޔާމީން މިނިވަން ކުރުމަށް ގޮވާލައްވާފައެވެ. އެގޮތުން ރިޔާސީ އިންތިހާބުގެ ޑިމޮކްރަޓްސްގެ ކެންޑިޑޭޓް އަދި ހުޅުދޫ ދާއިރާގެ މެންބަރު އިލްޔާސް ލަބީބްގެ ކެމްޕެއިނަށް ފުވައްމުލަކަށް ވަޑައިގެން އެ ރަށުގައި ބޭއްވި ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ ޔާމީން މިނިވަން ކުރުމަށް ކުރައްވަން ޖެހިވަޑައިގަންނަވާ ކޮންމެ ކަމެއް ކުރައްވަން ތައްޔާރަށް ހުންނެވި ކަމަށާއި އެކަމުގައި ފަސްޖެހި ވަޑައިނުގަންނަވާނެ ކަމަށެވެ.
މީގެ އިތުރުންވެސް ރިޔާސީ އިންތިހާބުގައި ވަކިން ވާދަ ކުރެއްވުމުގެ ބަދަލުގައި ޑިމޮކްރަޓްސްގެ ފަހަތަށް އިދިކޮޅު މައި ޕާޓީ ޕީޕީއެމް އެރުމަށްވެސް ނަޝީދު ވަނީ ގޮވާލައްވާފައެވެ. އަދި އެމްއެމްޕީއާރްސީ ހިޔާނާތުގެ މައްސަލައިގައި 200 އަށްވުރެ ގިނަ މީހުން ޝާމިލް ވާއިރު ހަމައެކަނި ރައީސް ޔާމީނަށް އެކަމުގެ އަދަބު ލިބުމަކީ އެއްވެސް އިންސާފެއް ނޫންކަމަށް ވިދާޅުވެ ނަޝީދު ވަނީ ކަންބޮޑުވުން ފާޅުކުރައްވާފައެވެ.
ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިިން ކުށް ސާބިތުވެ 11 އަހަރަށް ޖަލަށް ލުމާއި 5 މިލިއަން ޑޮލަރުން ޖޫރިމަނާ ކުރުމަށް ކްރިމިނަލް ކޯޓުން ހުކުމް ކުރީ މިދިޔަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.
ޖަލު ހުކުމެއްގައި ހުންނެވި ނަމަވެސް އިންތިހާބުގައި ވާދަކުރެއްވުމަށް ޔާމީން ވަނީ އީސީއަށް ކެންޑިޑެސީ ފޯމް ހުށަހަޅުއްވާފައެވެ. ނަމަވެސް ކެންޑިޑެސީ ބަލައިނުގަތުމަށް ގާނޫނުއަސާސީގެ 109 ވަނަ މާއްދާ އަށް ރިއާޔަތްކުރުމަށް ފަހު އީސީން ވަނީ ނިންމާފައެވެ. އެ މާއްދާގައިވާ ގޮތުން، ރައީސް ކަމަށް ކުރިމަތިލެވޭ މީހަކީ 12 މަސް ދުވަހަށް ވުރެ ދިގު މުއްދަތެއްގެ ހުކުމެއް ތަންފީޒު ކުރަމުން ދާ މީހަކަށް ވެގެނެއް ނުވާނެއެވެ. އެ މައްސަލަ ސުޕްރީމް ކޯޓަށް ޔާމީންގެ ފަރާތުން ހުށަހަޅުއްވި ނަމަވެސް އެ ކޯޓުން މައްސަލަ ނިންމާފައި ވަނީ ޔާމީން އާ ދެކޮޅަށެވެ.
ރިޔާސީ އިންތިހާބުން ޔާމީނަށް ފުރުސަތު އެއްކޮށް ބަންދުވުމުން ޕީޕީއެމް/ޕީއެންސީގެ ރިޔާސީ ކެންޑިޑޭޓަކަށް ނެރުނީ މާލޭގެ މޭޔަރު ޑރ. މުހައްމަދު މުއިއްޒުއެވެ. މުއިއްޒުވެސް ވިދާޅުވެފައި ވަނީ ވެރިކަމަށް ހޮވިއްޖެނަމަ އެންމެ ފުރަތަމަ ކުރައްވާނެ ކަމަކީ ޔާމީން މިނިވަން ކުރުން ކަމަށެވެ.
