ރާއްޖޭގައި 10،000 ޓަނަށްވުރެ ގިނައިން މަސް ރައްކާކުރެވޭނެ ގޮތް ހަދައިދޭނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް މިހެން ވިދާޅުވީ، "އުފާވެރި އަމާން ރާއްޖެ" ކެމްޕެއިނަަށް ގއ. ދެއްވަދޫ އަށް ވަޑައިގެން ދެއްވަދޫގައި ބޭއްވި ބަނދަރު ބައްދަލުވުމުގައެވެ.
ރައީސް ވިދާޅުވީ، މިއޮތް ހުރިހާ ޒަމާނެއްގައި ރާއްޖެއިން ބާނާ މަހުގެ ބޮޑުބައި ވިއްކަމުން ގެންދިޔައީ ރޯމަހުގެ ގޮތުގައި ކަމަށާއި އަދި އޭގެ އަގު ކަނޑައަޅަނީ ތައިލެންޑުގައި ހުންނަ ކޮންމެވެސް މީހެއް ކަމަށެވެ. މިއީ މިކަން އޮންނަން ޖެހޭނެ ގޮތެއް ނޫން ކަމަށާއި ރާއްޖޭގެ މަހުގެ އަގު ކަނޑައަޅަން ޖެހޭނީ ދިވެހިން ކަމަށާއި އެކަން ކުރެވޭނީ ބާނާ މަސް ރައްކާ ކުރެވިގެން ކަމަށް ރައީސް ވިދާޅުވިއެވެ.
މަސްވެރިކަމުގެ ސިނާއަތް ތަރައްގީ ކުރުމަށް ކުރެވޭ މަސައްކަތް ނިމޭއިރުގައި ރާއްޖޭގައި 10،000 ޓަނަށް ވުރެ ގިނައިން މަސް ރައްކާ ކުރެވޭ ގުދަންތައް ހުންނާނެ ކަމަށް ރައީސް ވިދާޅުވިއެވެ. މި ބަދަލާއެކު ބޭރުގެ މާރުކޭޓުތަކަށް ރާއްޖެއިން މަސް ވިއްކާނެ އަގު ރާއްޖޭގެ މަސްވެރިންނަށް ކަނޑައެޅުމުގެ ފުރުސަތު ލިބޭނެ ކަމަށް ވިދާޅުވިއެވެ.
މިކަމުގެ ވަގުތީ ހައްލެއްގެ ގޮތުގައި ފަސޭހައިން މަސްވެރިންނަށް އައިސް ލިބޭނެ ގޮތް ހެދުމާއި ހުރިހާ މަހެއް ކިރޭނެ ގޮތް ހެދުމާއި ބާނާ މަހަށް ފަސޭހައިން ފައިސާ ލިބޭނެ ގޮތް ހެދުން ހިމެނޭ ކަމަށް އެމަނިކުފާނު ވިދާޅުވިއެވެ.
ދެއްވަދޫ ރައްޔިތުންނާ ވާހަކަދައްކަވަމުން ރައީސް ވިދާޅުވީ، އަންނަ ދައުރުގެ ތެރޭގައި ދެއްވަދޫއަށް ކޮށްދެއްވާނެ ކަންތައްތަކެއް އެބަހުރި ކަމަށެވެ. އެގޮތުން ދެއްވަދޫގައި އައިސް ޕްލާންޓް ހެދުމާއެކު، ކުރު މުއްދަތަކަށް މަސް ރައްކާކުރާނެ ތަނެއް ގާއިމްކޮށްދެއްވާނެ ކަމަށާއި، މަލްޓިޕާޕަސް ހޯލު ސްކޫލަށް އިތުރުކޮށްދެއްވާ، ކައުންސިލް އައު އިމާރާތް އަޅުއްވައިދެއްވާނެ ކަމަށް ރައީސް ވިދާޅުވިއެވެ.
މީގެ އިތުރުން ރައްޔިތުން ބޭނުންވެފައިވާ ބޯހިޔާވަހިކަމަށް ހައްލު ހޯއްދަވައިދެއްވުމަށް ހައުސިން ޔުނިޓް އަޅުއްވާނެ ކަމަށާއި، ބިން ހިއްކުމާއެކު މޫދަށް އެރޭނެ ސަރަހައްދެއް ގާއިމްކޮށްދެއްވާނެ ކަމަށް ވެސް ރައީސް ވިދާޅުވިއެވެ.
ކުރިން ބުނި ވައުދު ފުއްދާ އަނެއްކާވެސް މަސްވެރިން ގުބޯހައްދަނި ދެނެއް މަސްވެރިން ނެހެއްދޭނެ،