ރައީސް ޕީޕީއެމްއަށް: އިންތިހާބުގައި ވާދަ ނުކުރުމަކީ މުޅި ގައުމަށް ދެވޭ ދެރައެއް

އަންނަ މަހު 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އިދިކޮޅު އެންމެ ބޮޑު އެއް ޕާޓީ ކަމަށްވާ ޕީޕީއެމް އިން އިންތިހާބުގައި ވާދަ ނުކުރުމަކީ ޕީޕީއެމްގެ މެންބަރުންގެ އިތުރުން މުޅި ގައުމަށް ވެސް ލިބިގެންދާނެ ދެރައެއް ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

މިހާރު ނިލެންދެ އަތޮޅު ދެކުނުބުރިއަށް ކުރައްވަވާ ކެމްޕެއިން ދަތުރުފުޅުގައި ދ.މީދޫއަށް ވަޑައިންގެން އެރަށު ރައްޔިތުންނާ ވާހަކަފުޅު ދައްކަވަމުން ރައީސް ވިދާޅުވީ، ވާދަވެރި ސިޔާސީ ހަރަކާތް ހިންގޭނީ ވަދަވެރިކަމާ އެކީގައި ހުރިހާ ސިޔާސީ ޕާޓީއަކުން މަސައްކަތް ކޮށްގެން ކަމަށެވެ. ނަމަވެސް ޕީޕީއެމް އިން މިއަދު މަސައްކަތް ކުރަމުން އެ ގެންދަނީ އިންތިހާބު ބޮއިކޮޓް ކުރައްވަން ކަމަށާއި ވަކި މީހެއްގެ މަސްލަހަތު ހިމާޔަތްކޮށް، ވަކި މީހެއްގެ ފަހަތުގަައި އެނބުރޭ ސިޔާސީ ޕާޓީއެއްގެ ގޮތުގައި ޕީޕީއެމް ފެނިގެންދާ ކަމަށްވެސް ރައީސް ވިދާޅުވިއެވެ.

އެމްޑީޕީންވެސް އެކަން ކަޑައްތުކޮށްފައިވާ ކަން ފާހަގަކުރައްވާ ރައީސް ވިދާޅުވީ، 2018 ވަނަ އަހަރާ ޖެހިގެން އައިއިރުވެސް އެކަން އޮތީ އެގޮތަށް ކަމަށާއި، އެހެންނަމަވެސް ޕާޓީގެ އިސް މެންބަރުންގެ ލަފައާ އެހީގެ މަތިން އެކަމުން އަރައިގަނެވުނު ކަމަށެވެ.

ޕީޕީއެމް އަކީވެސް ވާދަވެރި ޕާޓީއެއް ކަމަށާއި ވަކި މީހެއްގެ ފަހަތުގައި ނުތިއްބަވާ ކެންޑިޑޭޓަކު ނެރެގެން ކުރިއަށް ގެންދެވުމަށް ރައީސް ވަނީ ގޮވާލައްވާފައެވެ. "ތިބޭފުޅުން ވަކި މީހެއްގެ ފަހަތުގައި ނުތިއްބަވާ ކެންޑިޑޭޓަކު ނެރުއްވައިގެން ވަޑައިގަންނަވާށޭ. ތާއިދު ކުރާ ޕާޓީގެ މެންބަރުން މަގުމަތި ނުކުރައްވާށެ. އެއީ ދެވޭ ވަރަށް ބޮޑު ދެރައެއް. މިއަދު އަޅުގަނޑު ރާއްޖޭގެ ހުރިހާ ރައްޔިތުންނަށް މި ގޮވާލަނީ، ޕީޕީއެމްގެ މެންބަރުންނާ ވެސް އެކީގައި ވަޑައިގަންނަވާށޭ." ރައީސް ވިދާޅުވިއެވެ.

އަދި އެންމެ ފުރަތަމަ އީސީއަށް ފޯމު ހުށަހެޅުއްވީ އެ މަނިކުފާނުކަން ފާހަގަކުރައްވާ ވިދާޅުވީ އެއީ އެޅިގެންދިޔަ ހެޔޮ ފާލެއް ކަމަށެވެ. ރައީސް މިގޮތަށް ވިދާޅުވެފައިވަނީ ޕީޕީއެމާ ގުޅިފައިވާ ޕީއެންސީގެ ފަރާތުން މާލޭގެ މޭޔަރު ޑރ. މުހައްމަދު މުއިއްޒު އިންތިހާބުގައި ވާދަ ކުރެއްވުމަށް މިއަދު އީސީ އަށް ފޯމް ހުށަހަޅުއްވާފައި ވަނިކޮށެވެ.

ރިޔާސީ އިންތިހާބުގައި ޔާމީނަށް ވާދަ ނުކުރެއްވޭނެ ކަމަށް އިލެކްޝަންސް ކޮމިޝަނުން ނިންމުމުން ސުޕްރީމް ކޯޓަށް ޕީޕީއެމުން ހުށަހެޅި ދުސްތޫރީ މައްސަލައިގެ އަޑުއެހުން ނިމި، ކޯޓުން ވަނީ އެންމެ ފަހުގެ ނިންމުން ނިންމާފައެވެ. އެގޮތުން އެންމެ މަތީ ކޯޓުން ނިންމީ އިލެކްޝަންސް ކޮމިޝަންގެ ނިންމުން ދެމެހެއްޓުމަށެވެ.