އެމްއެމްޕީއާރުސީގެ ހިޔާނާތުގެ ތެރޭގައި ހިމެނޭ ރ. ފުއްގިރި ކުއްޔަށް ދޫކުރުމުގައި ކުރީގެ ރައީސް އަބްދުﷲ ޔާމީން ގެ މައްޗަށް އުފުލާފައިވާ ދައުވާތަކުގެ މިއަދަށް ތާވަލްކުރި އަޑުއެހުން އެމަނިކުފާނުގެ އެދިވަޑައިގަތުމުގެ މަތިން ކެންސަލް ކޮށްފިއެވެ.
ކްރިމިނަލް ކޯޓުގެ މީޑިއާ އޮފިޝަލަކު "ދަ ޕްރެސް" އަށް ވިދާޅުވީ މިއަދުގެ އަޑުއެހުން ކެންސަލް ކޮށްފައި ވަނީ ދައުވާ ލިބޭ ފަރާތުގެ ހާލަތު ހުރި ގޮތުން އެ ފަރާތުން އެދިވަޑައިގަތުމުގެ މަތިން ކަމަށެވެ.
މިއަދުގެ އަޑުއެހުން ކެންސަލް ކޮށްދެއްވުމަށް ރައީސް ޔާމީން އެދިވަޑައިގެންފައި ވާއިރު މިދިޔަ ހޯމަ ދުވަހު އެމަނިކުފާނުގެ މަންމާފުޅު ވަނީ އަވަހާރަ ވެފައެވެ. އުމުރުފުޅުން 85 އަހަރުގެ ޔާމީންގެ މަންމާފުޅު، ފާތުމަތު ހަސަން އަވަހާރަވީ އިރު، އޭނާ ދިރިއުޅުއްވަނީ ލަންކާގައި އާއިލާގެ ބޭފުޅުންނާއެކު ގައެވެ.
ފުއްގިރި މައްސަލާގައި ކުރީގެ ރައީސް ޔާމީންގެ މައްޗަށް ރިޝްވަތު ހިފުމާއި މަނީ ލޯންޑަރިންގެ ދައުވާ އަދި ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑުން އެ ފައިސާ ލޯންޑާކުރި ކަމުގެ ދައުވާ ކުރެއެވެ.
އެމްއެމްޕީއާރުސީގެ ހިޔާނާތުގެ ތެރޭގައި ހިމެނޭ ރ. ފުއްގިރި ކުއްޔަށް ދޫކުރުމުގައި ކުރީގެ ރައީސް އަބްދުﷲ ޔާމީން ގެ މައްޗަށް އުފުލާފައިވާ ދައުވާގެ ހެކިބަސް ނަގަމުން ދާއިރު އެ މައްސަލާގައި މަގާމުގެ ނުފޫޒު ބޭނުން ކުރައްވައިގެން މއ. ކުރިކީލަހިޔާ އަހްމަދު ރިޒާ "ކްރިކް ރިޒާ" މެދުވެރިކޮށް ރިޝްވަތުގެ ގޮތުގައި 1.12 މިލިއަން ޑޮލަރު ހޯއްދަވައި، އެ ފައިސާ ސަން ސިޔާމްގެ ދެ ކުންފުންޏެއް މެދުވެރިކޮށް ލޯންޑާ ކުރެއްވި ކަމުގެ ތުހުމަތު ޔާމީންގެ މައްޗަށް ކޮށްފައި ވާއިރު ކްރިކް ރިޒާގެ މައްޗަށް ކޮށްފައިވާ މަނީލޯންޑަރިންގެ ދައުވާގެ ޝަރީއަތްވެސް ކުރިއަށް ދަނީ އެއް ގަޒިއްޔާއަކުންނެވެ.
އެހެންނަމަވެސް ކްރިކް ރިޒާ ބަލިވެ އުޅޭތީ ޖެހިޖެހިގެން 5 ފަހަރު އަޑުއެހުން ކެންސަލު ކޮށްފައިވާއިރު ކްރިކް ރިޒާގެ ސަބަބުން ޝަރީއަތް މަޑުޖެހިފައި ވާތީ، އޭނާގެ ބައި މި ވަގުތަށް އަނބުރާ ގެންދަން ޕްރޮސިކިއުޓާ ޖެނަރަލްގެ އޮފީހުން ކްރިމިނަލް ކޯޓުގައި އެދުމާއެކު މިހާރު މި މައްސަލާގެ ޝަރީއަތުގެ އަޑުއެހުންތައް ކުރިއަށް ގެންގޮސްފައި ވަނީ ކްރިކް ރިޒާގެ ބައި އުނިކުރުމަށް ފަހުއެވެ.
މި މައްސަލާގައި ހެކިބަސް ނެގުމުގެ މަރުހަލާ މިހާރު ކުރިއަށްދާއިރު އެންމެ ފަހުން ބޭއްވި އަޑުއެހުމުގައި ސަން ކޮންސްޓްރަކްޝަން ކުންފުނީގެ އޭރުގެ ފައިނޭންސް ޑިރެކްޓަރު ސްރީލަންކާގެ ސްރީތަކުމާރުގެ ހެކިބަސް ނަގަން މަސައްކަތްކޮށްފައިވާއިރު އިންޓަނެޓް މައްސަލައެއް ދިމާވެ ހެކިބަސް ނެގުން ފުރިހަމަ ކުރެވިފައެއް ނުވެއެވެ. އަދި މުހައްމަދު ޝިފާއު ނަމަކަށް ކިޔާ މީހެއްގެ ހެކިބަސް ނަގަން ވެސް އެދުވަހު މަސައްކަތް ކުރި ނަމަވެސް އޭނާ ހާޒިރުވެފައިވަނީ ސައޫދީ އަރަބިއްޔާގެ ޖިއްދާގައި ހުންނަ ކޮންސިއުލޭޓްއަށް ކަމުން އެމްބަސީ ހުރި ގައުމެއްގައި ކޮންސިއުލޭޓް މެދުވެރިކޮށް ހެކިބަސް ނުނަގަން ޝަރީއަތުން ވަނީ ނިންމާފައެވެ.
