މިދިޔަ ދެ މަހެއްހާ ދުވަހު ހުށަހެޅިފައިވާ ވައްކަމުގެ އެކި މައްސަލަތަކާ ގުޅިގެން ހޯދިފައިވާ ތަކެތީގެ އަގު 350،000 ރުފިޔާ އަށް ވުރެ އިތުރު ކަމަށް، ފުލުހުން ބުނެފިއެވެ.
ފުލުހުން ބުނީ، މައްސަލަތައް ހުށަހެޅިފައި ވަނީ ހުޅުމާލެ ފޭސް 1 ގެ ފުލުހުންނަށް ކަމަށާއި، އޭގެ ތެރެއިން ބައެއް ތަކެތި ހޯދައި ވެރިފަރާތްތަކާ މިހާރު ހަވާލުކޮށްފައިވާނެ ކަމަށެވެ.
މިގޮތުން، ހުޅުމާލެ ފޭސް 1 ގެ ފުލުހުން ކުރިއަށް ގެންދިޔަ އޮޕަރޭޝަންތަކުގައި ހޯދާފައި ވަނީ މިދިޔަ ދެ މަހުގެ ވައްކަމުގެ މައްސަލަތަކުގައި ހިމެނޭ ތަކެތި ކަމަށް ފުލުހުން ބުންޏެވެ.
ވައްކަމުގެ މައްސަލަތަކުގައި ހޯދާފައިވާ ތަކެތީގެ ތެރޭގައި މޯބައިލް ފޯނާއި، އިލެކްޓްރޯނިކް އެކި ސާމާނާއި ސައިކަލާއި ފައިސާ ހިމެނޭ ކަމަށް ފުލުހުން މައުލޫމާތު ދެއެވެ. ފުލުހުން ބުނާ ގޮތުން މި ތަކެތީގެ އަގު 356،000 ރުފިޔާ އަށް ވުރެ ބޮޑެވެ.
މި މައްސަލަތަކާ ގުޅިގެން ފުލުހުން މީހަކު ހައްޔަރުކުރިކަން ނުވަތަ ނުކުރާ ކަން ހާމައެއް ނުކުރެއެވެ. އަދި މި މައްސަލަތައް އެއް މައްސަލަ އަނެއް މައްސަލައާ ގުޅިފައިވޭތޯ ނުވަތަ ނޫންތޯ ސާފުކުރުމަށް ކުރި ސުވާލަކަށް ވެސް ޖަވާބެއް ނުލިބުނެވެ.
