އެއްވެސް މަޝްރޫއެއް ކާމިޔާބު ކުރެވޭނީ އެ މަޝްރޫއުގައި ހިމެނޭ ކަންތައްތައް ބެލެހެއްޓުމާ ހަވާލު ކުރެވޭ ފަރާތްތަކުގެ ދައުރު ފުރިހަމައަށް އަދާކޮށްގެން ކަމަށް ހުކުރު ހުތުބާގައި ބުނެފިއެވެ.
މަޝްރޫއުތައް ކާމިޔާކު ކުރުމާ ބެހޭ ވާހަކައާ މިއަދުގެ ހުތުބާގައި ގުޅުވާލީ ހިޖްރައިގެ ޒިކްރާއާއި ފިލާވަޅުތަކަށެވެ.
ރަސޫލާ ހިޖުރައިގެ ދަތުރުފުޅަށް ގެކޮޅުން ނިކެމެ ވަޑައިގެންނެވި ރޭ، އެކަލޭގެފާނުގެ ދާންމަތިކޮޅުގައި އަވަހާރަފުޅު ލައްޕަވަން އަލީގެފާނާ ހަވާލު ކުރެއްވިިއެވެ. މި މަސްއޫލިއްޔަތު އަލީގެފާނު އަދާ ނުކުރެއްވިނަމަ މުޝްރިކުންނަށް އެނގުމަކާ ނުލައި، ރަސޫލާއަށް މައްކާއިން ބޭރަށް ނިކުމެވަޑައެއް ނުގެންނެވުނީސް ކަމަށް ހުތުބާގައި ބުންޏެވެ.
ރަސޫލާ މަދީނާއަށް ކުރެއްވި ހިޖުރައަކީ، ދީނަށް ނަސްރު ހޯއްދެވުމަށްޓަކައި އެޅުއްވި ހަރުދަނާ ފިޔަވަޅެއް ކަމަށާއި އެއީ ޖިހާދުގެ މައިދާން، މައްކާއިން މަދީނާއަށް ބަދަލު ކުރެއްވުން ކަމަށް ވެސް ހުތުބާގައި ވަނީ ބުނެފައެވެ.
ނަބަވީ ހިޖުރައިގެ ސަބަބުން އިސްލާމްދީނުގެ ތަސާމުހު ހާމަވިކަން ފާހަގަކޮށް ހުތުބާގައި ބުނީ ހިޖްރައިގެ ސަބަބުން އެހެން ދީންތަކުގެ މީހުންނާ މުސްލިމުންނާ ދެމެދު، އެއްބަޔަކު އަނެއް ބަޔަކަށް އިހްތިރާމު ކުރުން، ފައިދާ ލިބިގަތުން އަދި މައުލޫމާތު ބަދަލު ކުރުމުގެ އުސޫލު ތައާރަފުވި ކަމަށެވެ.
ހިޖްރައިން ދަސްވާ އެއް ފިލާވަޅަކީ ވަތަން ދެކެ ލޯބިވުން ކަމަށާއި ރަސޫލާ މައްކާއިން ނިކުމެ ވަޑައިގަންނަވަމުން މައްކާއާ މުހާތަބު ކުރައްވާ ހަދީސް ކުރެއްވި ބަސްފުޅުތަކަކީ މިއަދުގެ މުސްލިމުންނަށް ވަތަން ދެކެ ލޯބިވުމަށް އަގުހުރި ފިލާވަޅެއް ކަމަށް ވެސް ހުތުބާގައި ވަނީ ބުނެފައެވެ. ރަސޫލާ ހަދީސް ކުރައްވާފައި ވަނީ ﷲގެ ބިންތަކުގެ ތެރެއިން އެންމެ ރަނގަޅު ބިމަކީ މައްކާ ކަމުގައެވެ. އަދި ތިބާގެ އަހުލުވެރިން ތިބާގެ ބިމުން ތިބާ ނެރެ ނުލިނަމަ، ރަސޫލާ މައްކާއިން ނިކެމެވަޑައެއް ނުގަންނަވާނެ ކަމުގައެވެ.
ހުތުބާގައި އިތުރަށް ބުނީ މާތް ﷲ ވޮޑިގެން ވަނީ ތަގުވާވެރިންނާއެކުގައި ކަމަށާއި ހިޖުރައަކީ ނުބައި ކަންތައްތައް ދޫކޮށް، ރަނގަޅު ކަންތައްތަކަށް ހިޖުރަކުރުން ކަމުގައެވެ. އަދި މުސްލިމުންނަށް އިއްޒަތާއި ގަދަރު ލިބުން އޮތީ އެ މީހުންގެ އަގީދާ ހިފެހެއްޓި މިންވަރަކުން ކަމަށެވެ.
ރަސޫލާ މަދީނާގައި ގާއިމް ކުރެއްވި އިސްލާމީ ދައުލަތް ކުޑަ ދުވަސްކޮޅެއްގެ ތެރޭގައި ދުނިޔޭގައި އޮތް އެންމެ ބޮޑު ދެ ބާރު ކަމުގައިވާ ފާރިސީންނާއި ރޯމަނުން ބަލިކުރީ މުސްލިމުންގެ އަގީދާއާއި އީމާންކަން ހަރުދަނާވުމުން ކަމަށް ވެސް ހުތުބާގައި ވަނީ ބުނެފައެވެ. އެއީ މުސްލިމުންގެ އަދަދު ގިނަވެގެން ނުވަތަ ހަތިޔާރު މޮޅުވެގެން ނޫން ކަމަށް ހުތުބާގައި ބުނެފައިވެއެވެ.
