މާލެ، ވިލިމާލެ، ގުޅީފަޅު އަދި ތިލަފުށި ގުޅާލައި ހަދާ ބްރިޖުގެ ބައިތަކަކީ ދުނިޔޭގެ އެންމެ އުސް ޕްރީކާސްޓް ސެގްމެންޓްތައް ކަމަށް އިންޑިއާ ހައިކޮމިޝަނުން ބުނެފިއެވެ.
ހައި ކޮމިޝަނުން ކުރި ޓްވީޓެއްގައި ބައެއް ސެގްމެންޓްތަކުގެ ފޮޓޯތައް ދައްކާލާފައިވާއިރު އެ ފޮޓޯތަކުން ފެންނަ ގޮތުގައި ބައެއް ސެގްމެންޓްތައް މިހާރު ހުރީ ނިމިފައެވެ.
އެކޮމިޝަނުން ބުނީ، މިހާތަނަށް ދުނިޔޭގައި ހަދާ ޕްރީކާސްޓް ސެގްމެންޓްތަކުގެ އުސްމިނުގައި 8.177 މީޓަރު ހުންނާނެ ކަމަށެވެ. އެ ސެގްމެންޓްތައް ހެދުމުގެ މަސައްކަތް ކުރިއަށް ދަނީ ގުޅީފަޅުގައެވެ.
ބްރިޖު އަންނަ އަހަރު ނިންމާލެވޭނެ ކަމަށް ދާދި ފަހުން ރައީސް އިބްރާޙިމް މުހައްމަދު ސޯލިހް ވަނީ ވިދާޅުވެފައެވެ. ނަމަވެސް ބްރިޖުގެ މަސައްކަތް ކުރިއަށް ދާ ގޮތުންނާއި ދިމާވަމުންދާ ބައެއް ހާދިސާތަކާ ގުޅިގެން ގިނަ ބަޔަކު އަންނަނީ ފާޑުކިޔަމުންނެވެ.
މާލެ, ވިލިމާލެ، ގުޅިފަޅު އަދި ތިލަފުށި ގުޅުވާލާ ބްރިޖުގެ މަސައްކަތް ފެށުމަށް އިންޑިއާގެ އެފްކޯންސް އިންފްރާސްޓްރަކްޗާ ކުންފުންޏާ އެކު އެއްބަސްވުމެއްގައި ސޮއިކޮށްފައި ވަނީ އޮގަސްޓު 26، 2021 ގައެވެ. އަދި ބްރިޖުގެ އަމަަލީ މަސައްކަތް ފަށާފައި ވަނީ އޮގަސްޓް 2، 2022 ގައެވެ.
އެފްކޯންސް ކުންފުނިން ރާއްޖޭގައި ހިންގާ ބްރިޖް މަޝްރޫއުގެ ދަށުން 6.695 ކިލޯ މީޓަރުގެ ބްރިޖާއި ކޯޒްވޭއެއް ހަދާ އިރު، މި މަޝްރޫއަަކީ 8.2 ބިލިއަން ރުފިޔާ ހަރަދު ވާނެ މަޝްރޫއެކެވެ. މި ބްރިޖަކީ ފުން ހިސާބުތަކުގައި 141 ކިލޯމީޓަރުގެ މެރިން ވިއަޑަކްޓް، ތިލަ ހިސާބުތަކުގައި އަދި އެއްގަމުގައި 2.32 ކިލޯމީޓަރުގެ މެރިން ވިއަޑަކްޓް، އަދި 2.96 ކިލޯމީޓަރުގެ އެޓް-ގްރޭޑް މަގުތަކެއް ހިމެނޭހެން ހަތަރު ރަށުގެ މެދުގައިވާ ކަނޑުގެ ސަރަހައްދުގައި ހަދާ 140 މީޓަރުގެ ދިގު ނެވިގޭޝަން ބްރިޖެކެވެ.
