އަމީނީމަގުގައި ގަވައިދާ ހިލާފަށް ޕާކުކޮށްފައި ހުރި އުޅަނދުފަހަރު އަންނަ އާދީއްތަ ދުވަހުން ފެށިގެން ނަގަން ފަށާނެ ކަމަށް، ފުލުހުން ބުނެފިއެވެ.
މާލޭގެ ބައެއް ސްކޫލްތަކުގެ އިތުރުން، ސަރުކާރުގެ ބައެއް އިދާރާތަކާއި މުއައްސަސާތައް ހުންނަ އަމީނީމަގަކީ އާންމު ގޮތެއްގައި ގިނަ މީހުން ބޭނުންކުރާ އެއް މަގެވެ. ސްކޫލް ނިމޭ ވަގުތުތަކުގައި ނުވަތަ އޮފީސްތައް ނިމޭ ވަގުތު އާންމު ގޮތެއްގައި އަމީނީމަގުގައި އުޅަނދުފަހަރު ތޮއްޖެހޭކަން ފާހަގަކުރެވެއެވެ.
މިދިޔަ އަހަރު މާލޭގައި މިނީބަހުގެ ހިދުމަތް ދޭން ފަށައި، އަމީނީމަގުގައި ޕާކުކުރުން މަނާކޮށްފައި އޮތް ނަމަވެސް، ދޭތެރެއަކުން އުޅަނދުފަހަރު ޕާކުކޮށްފައި ހުރެއެވެ. އޭގެ އިތުރުން އަމީނީމަގު އަލުން ހަދަން ފަށައި ތާރު އެޅި ސަރަހައްދުގެ ދެ ފަޅީގައި ވެސް އުޅަނދުފަހަރު ޕާކުކޮށް ބަހައްޓާފައި ހުރެއެވެ.
ފުލުހުން ބުނީ، އަމީނީމަގުގައި ގަވައިދާ ހިލާފަށް އުޅަނދުފަހަރު ޕާކުކޮށްފައި ހުރުމުގެ ސަބަބުން ޓްރެފިކް ތޮއްޖެހި، އާންމުންނަށް ހިނގާބިނގާވެ އުޅުމަށާއި، އުޅަނދުފަހަރު ދުއްވާ މީހުންނަށް ދަތިވާކަން ފާހަގަކުރެވިފައިވާ ކަމަށެވެ. އެހެންކަމުން، ތިން ދުވަހުގެ މުއްދަތަކަށް ބެލުމަށް ފަހު، ގަވައިދާ ހިލާފަށް ޕާކުކޮށްފައި ހުރި އުޅަނދުފަހަރު އަންނަ އާދީއްތަ ދުވަހުން ފެށިގެން ނަގަން ފަށާނެ ކަމަށް ފުލުހުން ބުންޏެވެ.
ވެރިރަށް މާލެ އަށް ދިމާވެފައިވާ އެންމެ ބޮޑު އެއް މައްސަލައަކީ އުޅަނދުފަހަރު ޕާކުކުރާނެ ޖާގަ ނެތް މައްސަލައެވެ. މާލޭގެ ބައެއް ސަރަހައްދުތަކުގައި ޕާކިން ޒޯންތައް ހަދާފައި އޮތަސް، އަދިވެސް މާލޭގެ މަގުތަކުގައި ގިނަ އުޅަނދުފަހަރު ޕާކުކުރަމުންދާކަން ފާހަގަކުރެވެއެވެ.
