އަންހެން ފުލުހަކަށް ގެވެށިއަނިޔާ ކުރި މައްސަލައެއް ހުށަހެޅުމާ ގުޅިގެން އެ މައްސަލަ ތަހުގީގު ކުރަމުންދާ ކަމަށް ފުލުހުންގެ މުއައްސަސާ އިން ބުނެފިއެވެ.
ފުލުހުން ބުނީ މިމައްސަލަ ތަހުގީގު ކުރުމުގެ ތެރެއިން ލިބިފައިވާ މައުލޫމާތުގެ އަލީގައި ޕްރޮފެޝަނަލް ސްޓޭންޑަޑްސް ކޮމާންޑުން ތަހުގީގެއް ހިނގަމުންދާ ކަމަށެވެ. ނަމަވެސް މި މައްސަލައާއި ގުޅޭ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.
އިއްޔެ އޮންލައިން ނޫސް 'ދިޔަރެސް' ގައި ފުލުހުންގެ އޮފިސަރުންތަކެއް އަންހެން ފުލުހަކާއެކު ބަދުއަހުލާގީ އަމަލު ހިންގި މައްސަލައެއް ފެންމަތި ވި ކަމަށް ލިޔެފައިވާ ހަބަރެއްގައި އެކަން ސިއްރު ކުރުމަށް ފުލުހުންގެ އިސް ފަރާތްތަކުން މަސައްކަތް ކުރަމުން ދާ ކަމަށެވެ.
މިކަމާ ގުޅިގެން ފުލުހުން ބުނީ އެ އިދާރާއިން ތަހުގީގު ކުރަމުންދާ މައްސަލައެއްގެ ހަގީގަތް އޮޅުވާލަން، ތަހުގީގުގެ ތެރެއިން އުޅޭކަމަށް ބަޔާންކޮށް 'ދިޔަރެސް' ނޫހުން ޝާއިއު ކޮށްފައިވާ ހަބަރަކީ، އެކަމާ ގުޅޭގޮތުން ފުލުހުންގެ ކިބައިން މައުލޫމާތު އޮޅުންފިލުވުމަށް އެއްވެސް މަސައްކަތެއް ނުކޮށް ލިޔެފައިވާ ދޮގު ހަބަރެއް ކަމަށެވެ.
ދިވެހި ފުލުހުންގެ ހިދުމަތުގެ މުވައްޒަފުންގެ ޕްރޮފެޝަނަލް ކޮންޑަކްޓު ކަށަވަރު ކުރުމަށް ގާނޫނު ތަކުން ތަފާތު އިންތިޒާމުތައް ހަމަޖެހިފައިވާ ހިނދު، އެނިޒާމުތަކާ މެދު ރައްޔިތުންގެ އިތުބާރު ގެއްލޭގޮތަށް، ޒިންމާދާރުކަމެއް ނެތި އަދި މައުލޫމާތުގެ ސައްހަކަން ބެލުމަށް އެއްވެސް މަސައްކަތެއް ނުކޮށް މިފަދަ ހައްސާސް ކަންކަމުގައި ހަގީގަތާ ހިލާފު މައުލޫމާތު ހާމަކުރުމަކީ ފުލުހުން ކަންބޮޑުވާ ކަމެއް ކަމަށް ވެސް ފުލުހުން ވަނީ ބުނެފައެވެ.
