މިދިޔަ ހުކުރު ދުވަހު މާލޭގެ ގެއެއްގެ ތެރޭގައި މަރުވެފައި އޮއްވާ ފެނުނު މީހާ މަރުވީ ކަރަންޓުގައި ޖެހިގެން ކަމަށް، ފުލުހުން ބުނެފިއެވެ.
މާލޭގެ ހެންވޭރު ގެއެއްގައި 43 އަހަރުގެ ދިވެހި ފިރިހެނަކު މަރުވެފައިވާ ކަމަށް ފުލުހުންނަށް ރިޕޯޓުކޮށްފައި ވަނީ އެ ދުވަހު މެންދުރުފަހު 1:20 ހާއިރެވެ. އެ ވަގުތަކީ އާންމު ގޮތެއްގައި ހުކުރު ނަމާދުގެ ޖަމާއަތަށް ފަހު މީހުން އެނބުރި ގެތަކަށް ދާ ވަގުތެވެ.
އައިޖީއެމްއެޗާ ހަވާލާދީ ފުލުހުން ބުނީ، ހޮސްޕިޓަލަށް ގެންދިޔަ އިރު ވެސް އޭނާ އޮތީ މަރުވެފައި ކަމަށެވެ.
މީޑިއާ އަށް މިއަދު ދިން މައުލޫމާތުގައި ފުލުހުން ބުނީ، މަރުވެފައި އޮއްވާ ހެންވޭރު ގެއަކުން ފެނުނީ ކަރަންޓު ކޭބަލެއް ވަގަށް ނެގުމަށް ވަދެ އެ ގެއަށް އުޅުނު މީހެއް ކަމަށެވެ. އޭނާ ނިޔާވީ ކޭބަލް ބުރިކުރަން އުޅުމުގެ ތެރޭގައި ކަރަންޓުގައި ޖެހިގެން ކަމަށް ތަހްގީގަށް ބެލެވޭ ކަމަށް ބުންޏެވެ.
ފުލުހުން ބުނި ގޮތުގައި:
- ކަރަންޓުގައި ޖެހިފައިވާ ކަމުގެ ނިޝާންތައް އޭނާގެ ހަށިިގަނޑުން ފެންނަން އެބަހުރި
- އޭނާ ބިން މައްޗަށް ވެއްޓިފައިވާ ތަނުން ވައްކަން ކުރަން ބޭނުންކުރާ ތަކެތި ފެނިފައިވޭ
ރާއްޖޭގައި މަސްތުވާތަކެތީގެ މައްސަލަތަކަށް ފަހު، ފުލުހުންނަށް އެންމެ ގިނައިން ހުށަހެޅެނީ ވައްކަމުގެ މައްސަލަތަކެވެ.
