އަޟްހާ އީދުގެ މުނާސަބަތު ކުލަގަދަކޮށް ފާހަގަކުރުމުގެ ގޮތުން މާލެސިޓީ ކައުންސިލުން މާލެ އާއި ވިލިމާލޭގައި ހަރުކުރި ކުލަބޮކިތަކާއި ގިޑިގެތައް ނެގުން ފަސްކުރާނެ ކަމަށް މާލެ ސިޓީގެ މޭޔަރ ޑރ. މުޙައްމަދު މުއިއްޒު ވިދާޅުވެއްޖެއެވެ.
މުއިއްޒު މިފަދައިން ވިދާޅުވީ އަޟްހާ އީދު ޗުއްޓީގައި މާލެއިން ބޭރުގައި ތިބި ގިނަ ފަރާތްތަކަކުން މި މަންޒަރުތައް ބަލާލުމުގެ ޝައުގުވެރިކަން ފާޅުކުރުމާއި ގުޅިގެންނެވެ.
މުއިއްޒު ވިދާޅުވީ މި ޢީދު ޗުއްޓީގައި އެކި ސަބަބުތަކާ ހުރެ ރާއްޖެއިން ބޭރަށް ދިޔަ ގިނަ ބަޔަކު ދަނީ އީދު ލައިޓްތައް ބަލާލުމުގެ ފުރުސަތު ލިބޭތޯ ސުވާލު ކުރަމުން ކަމަށާއި މާލެ ސިޓީ ކައުންސިލުން އެންމެ ފުރަތަމަ ނިންމީ މިއަދުން ފެށިގެން އެ ބޮކިތަކާއި ގިޑިގެތައް ނެގުމަށް ކަމަށެވެ. އެހެންނަމަވެސް ގިނަ ބަޔަކު އެ މަންޒަރުތައް ބެލުމަށް ޝައުގުވެރިކަން ފާޅުކުރުމާއި ގުޅިގެން ކުލަބޮކިތަކާއި ގިޑިގެތައް ނެގުން އަންނަ ހުކުރު އަދި ހޮނިހިރަށް ފަސްކުރަން ނިންމާފައިވާ ކަމަށް މުއިއްޒު ވިދާޅުވިއެވެ.
އީދަށް މާލޭގެ ބޮޑުތަކުރުފާނު މަގާއި މަޖީދީމަގު އަދި ސޯސަންމަގުގެ އިތުރުން ވިލިމާލެ ހިމެނޭހެން ބައެއް ބޮޑެތި މަގުތައް ޒީނަތްތެރި ކުރުމުގެގޮތުން މާލެ އާއި ވިލިމާލޭގައި ޖުމްލަ 22 ގިޑިގެ އާއެކު 2224 ބޮކި މާލެ ސިޓީ ކައުންސިލުން ވަނީ ހަރުކޮށްފައެވެ. ބައެއް ބޮޑެތި މަގުތައް ޒީނަތްތެރި ކުރުމުގެ ގޮތުން މާލެސިޓީ ކައުންސިލުން ވަނީ "އީދު މުބާރަކް" ގިޑިގެ ތަކާއި ޑިޒައިންތަކަށް ހަދާފައިވާ ގިޑިގެތަކުގައި ބޮކިފަތި ހަރުކޮށްފައެވެ.
ސިޓީ ކައުންސިލުން ބުނީ ހަތަރުވަނަ ދައުރުގެ ކައުންސިލުން ދަނީ މި 5 އަހަރަށް އެކުލަވާލާފައިވާ ސްޓްރެޓެޖިކް އެކްޝަން ޕްލޭން (ސެޕް) ތަންފީޒު ކުރުމަށް ގިނަ މަސައްކަތްތަކެއް ކުރަމުން ކަމަށާއި އެގޮތުން މިފަދައިން އެކި މުނާސަބަތުތަކާއި ގުޅުވައިގެން މަގުތައް ޒީނަތްތެރި ކުރުންވެގެންދާނީ ސެޕްގައި ހިމެނޭ "ޗާލު މާލެސިޓީ" އަމާޒަށް ވާސިލްވުމަށް އިތުރުވެގެންދާ ބޮޅަކަށް ކަމަށެވެ.
