ބޮޑު ޖަމާއަތުގައި އީދު ނަމާދުކުރާ ބައެއް ސަރަހައްދުތައް ބަންދުކުރަން ފުލުހުން ނިންމައިފިއެވެ.
ފުލުހުން ވަނީ މާދަމާ ހެނދުނު 6 އިން 8:30 އަށް ބޮޑު ޖަމާއަތުގައި ނަމާދުކުރާ ސަރަހައްދުތަކުން ބަންދު ކުރަން ނިންމާފައިވާ ސަރަހައްދުތައް ފާހަގަކޮށް ޗާޓެއް ނެރެފައެވެ. އެ ޗާޓުގައި ފިިރިހެނުންނަށް ހާއްސަ ސަރަހައްދާއި އަންހެނުންނަށް ހާއްސަ ސަރަހައްދުގެ އިތުރުން ޕާކު ކުރެވޭ އަދި ނުކުރެވޭނެ ސަރަހައްދުވެސް ވަނީ ފާހަގަކޮށްފައެވެ.
4 ފުރޮޅުލީ އުޅަނދުތަކަށް ނުވަދެވޭ ސަރަހައްދުތަކާއި އީދު ނަމާދަށްދާ މީހުންނަށް ޕާކު ކުރެވޭ ސަރަހައްދުތައް ވެސް ވަނީ ފާހަގަކޮށްފައެވެ.
ބޮޑު ޖަމާއަތް ބޭއްވުމަށް ހަމަޖެހިފައި ވަނީ މާފަންނު ސްޓޭޑިއަމާއި އިސްލާމީ މަރުކަޒާއި މައިދާން ސަރަހައްދާއި ސަލްމާން މިސްކިތާއި ވަށައިގެންވާ ސަރަހައްދާއި ހުޅުމާލެ ފުރަތަމަ ފިޔަވަހީގެ ސިންތެޓިކް ޓްރެކާއި ހުޅުމާލެ ދެވަނަ ފިޔަވަހީގެ ކްރިކެޓް ސްޓޭޑިއަމް އަދި ވިލިމާލެ ފުޓްބޯޅަ ދަނޑުގައެވެ.
މީގެ އިތުރުން ހުޅުމާލޭގެ ފުރަތަމަ ފިޔަވަހީގެ ބޮޑު ޖަމާއަތުގައި އީދު ނަމާދުކުރުމަށް ހަމަޖެހިފައިވާ ސިންތެޓިކް ޓްރެކް ސަރަހައްދުގެ ބައެއް މަގުތައްވެސް ބަންދުކުރަން ފުލުހުން ވަނީ ނިންމާފައެވެ.
މާލެ ސަރަހައްދުގައި 25 މިސްކިތެއްގައި އީދު ނަމާދު ކުރުމަށް ހަމަޖެހިފައިވާއިރު އޭގެތެރޭގައި ހިމެނެނީ މާލޭގެ 17 މިސްކިތް، ހުޅުމާލޭ ފޭސް 1ގެ 3 މިސްކިތް، ފޭސް 2ގެ 2 މިސްކިތް އަދި ހުޅުލޭގެ 2 މިސްކިތުގެ އިތުރުން ވިލިމާލޭގެ މިސްކިތެކެވެ.
