ޕީޕީއެމް އަދި ޕީއެންސީ ކޯލިޝަނުން އަލަށް އުފެއްދި "ދަ ޑިމޮކްރަޓްސް" ޕާޓީއާއެކު މަސައްކަތް ކުރަނީ ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔާމީންގެ އިރުޝާދުގެ މަތިން ކަމަށް ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވެއްޖެއެވެ.
ޕީޕީއެމްގެ އޮފީހުގައި މިއަދު ކުރިއަށް ގެންދިޔަ މަޝްވަރާ ތަކަށް ފަހު ބޭއްވި ޖޮއިންޓް ޕްރެސް ކޮންފަރެންސްގައި ވާހަކަ ދައްކަވަމުން ޝިޔާމް ވިދާޅުވީ "އެނގިވަޑައިގަންނަވާނެ މިއަދު ރައީސް ޔާމީން ޖަލުގައި އެ ހުންނެވީ، ހަމަ ވަރަށް ރަނގަޅަށް މިކަމުގެ އިންސްޓްރަކްޝަން ދެއްވާ" ކަމަށެވެ. އަދި އެމަނިކުފާނުގެ އިރުޝާދުގެ ދަށުން ނޫނީ ޕީޕީއެމް/ޕީއެންސީ އިން އެއްވެސް ފިޔަވަޅެއް ނާޅާނެ ކަމުގެ ޔަގީންކަން ޝިޔާމް ވަނީ ދެއްވާފައެވެ.
އަދި ސޯލިހު ވެރިކަމުން ބޭލުމަށް މަޖިލީހުގެ ތެރޭގައާއި ބޭރުގައި ތިން ޕާޓީ މަސައްކަތްތައް އަތުރާ ރާވައިގެން ބާރުކުރަން ކުރިއަށް ރާވާފައިވާ ކަމަށް ޝިޔާމް ވަނީ ވިދާޅުވެފައެވެ.
މި ޕްރެސް ކޮންފަރެންސްގައި ޑިމޮކްރެޓްސްގެ ފަރާތުން ބައިވެރިވެ ވަޑައިގެންނެވީ މެދު ހެންވޭރު ދާއިރާގެ މެންބަރު އަލީ އާޒިމްއެވެ. އާޒިމް ވިދާޅުވިގޮތުގައި ޕީޕީއާއެކު މަސައްކަތް ނުކުރެވެންވީ އެއްވެސް ސަބަބެއް ނެތް ކަމަށާއި ދެ ފަރާތުގެ ވެސް ހިޔާލު އެއްގޮތަ ކަމަށެވެ. އަދި އެ ހިޔާލަކީ ރައީސް އިބްރާހިމް މުހައްމަދު ސޯލިހުގެ ސަރުކާރު ބަދަލުކުރަން ޖެހޭކަން ދެފަރާތުންވެސް ގަބޫލު ކުރުން ކަމުގައި އާޒިމް ވަނީ ވިދާޅުވެފައެވެ.
ނޫސްވެރިއަކު ކުރި ސުވާލަށް ޖަވާބު ދެއްވަމުން އާޒިމް ވިދާޅުވީ އެމްއެމްޕީއާރްސީގެ ކޮރަޕްޝަންގެ މައްސަލައިގައި ޖަލަށްލާފައިވާ ރައީސް ޔާމީން ޖަލުން މިނިވަން ކުރުމަށް ޑިމޮކްރެޓްސްއިން މަސައްކަތް ކުރާނެ ކަމަށެވެ. އަދި އިންސާފުވެރި ޝަރީއަތެއް އޮތުމަކީ އަބަދުވެސް އެދޭކަމެއް ކަމަށާއި އެމްއެމްޕީއާރުސީގެ ހިޔާނާތުގެ ތުހުމަތު އެތައް ބަޔަކަށް އޮތް އިރު ހަމަ އެކަނި އެއް ބޭފުޅަކަށް ހުކުމްކޮށް، ޖަލަށް ލާފައި އިންނަ އިނުން، އެއީ ކަންބޮޑުވާ ކަމެއް ކަމަށް އާޒިމް ވަނީ ވިދާޅުވެފައެވެ.
މީގެ އިތުރުންވެސް އިންޑިއާ އައުޓް ހަރަކާތުގައި ޑިމޮކްރެޓްސް އިން ބައިވެރިވާނެތޯ ނޫސްވެރިއަކު ސުވާލު ކުރުމުން އާޒިމް ވިދާޅުވީ ޑިމޮކްރެޓްސްގެ ފިކުރާ އެއްގޮތަށް ޕީޕީއެމް/ޕީއެންސީ، އެއް ދުވަހުގެ ތެރޭގައި މުޅިން ބަދަލުވެގެން ނުދާނެ ކަމަށާއި އެކަންތަައްްތަކަށް ވަގުތު ނަގާނެ ކަމަށެވެ.
މިއަދުގެ މަޝްވަރާތަކަށްފަހު އިދިކޮޅު ޕާޓީ ތަކުން ވަނީ ޖުލައި 3 ވަނަ ދުވަހުގެ ރޭ ތިން ޕާޓީ ގުޅިގެން ބާއްވާ ވަރުގަދަ ކަންމަތީ ޖަލްސާއެއް އޮންނާނެ ކަމަށް އިއުލާންކޮށްފައެވެ.
