ފަހި ދިރިއުޅުން ކޯރަރޭޝަން (އެފްޑީސީ) އިން ހުޅުމާލެ ފޭސް 2 ގައި ކުރިއަށް ގެންދާ ހައުސިން މަޝްރޫއުގެ ދަށުން ހަދާ ޓަވަރުތަކުގެ 1 ޓަވަރުގައި މިއަހަރު ނިޟޭ އިރު މީހުން އުޅެން ފަށާނެ ކަމަށް އެ ކޯޕަރޭޝަނުން ބުނެފިއެވެ.
"އަމާން" ނަމުގައި ކުރިއަށް ގެންދާ އެ މަޝްރޫެއުގެ މަސައްކަތުގެ ދުވެލި މިއަދު ނޫސްވެރިންނަށް ދައްކާލާފައި ވާ އިރު، އެ ކޯޕަރޭޝަނުން ބުނީ، ކުރިން އޮތް ޝެޑިއުލަށް ވުރެ މަސައްކަތް ލަސް ވެފައި ވާ ކަމަށާއި ނަމަވެސް އަހަރު ނިމުމުގެ ކުރިން 1 ޓަވަރުގައި މީހުންނަށް އުޅެވޭ ވަރުވާނެ ކަމަށެވެ.
ޖުމްލަ 4000 އެޕާޓުމަންޓް ހިމެނޭ 32 ޓަވަރުގެ ފައުންޑޭޝަން މަސައްކަތުގެ އިތުރުން ކޮންސްޓްރަކުޝަންގެ މަސައްކަތް ހިނގަމުން ދާ އިރު، އެ މަޝްރޫއަކީ އިންޑިއާގެ އެގްޒިމް ބޭންކުގެ ލޯނަކުން ކުރިއަށް ގެންދާ މަޝްރޫއެކެވެ. އިންޑިއާގެ 2 ކުންފުންޏެއް ކަމަށް ވާ ޖޭއެމްސީ އާއި އެންބީސީސީ އިން ކުރެ ކޮންމެ ކުންފުންޏަކަށް 2000 ޔުނިޓް ހަދަން ދީފައި ވާ މި މަޝްރޫއު ކުރިން ނިންމަން ޝެޑިއުލް ކޮށްފައި އޮތީ، 2024 ނަމަވެސް އެ މުއްދަތު 2025 އަށް ދެމިގެން ދާނެ ކަމަށް ވަނީ ބުނެފައެވެ.
މިއަދު އެފްޑީސީން ބުނީ، ޖޭއެމްސީ އާ ހަވާލު ކުރި 2000 ޔުނިޓް އަންނަ އަހަރު ނިމޭނެ ކަމަށާއި އެންބީސީސީ އާ ހަވާލު ކުރި 2000 ޔުނިޓް ނިމެނީ 2025 ގައި ކަމަށެވެ.
މިހާރު ގާތްގަނޑަކަށް 33 ޕަސެންޓް މަސައްކަތް ނިމިފައި މަސައްކަތާ ބެހޭ ގޮތުން އެފްޑީސީގެ ބިޒްނަސް ޑިވެލޮޕްމަންޓް އެންޑް ކޯޕަރޭޓް އެފެއާޒް މެނޭޖަރު އަހުމަދު ޝަމޫލް އަބްދުﷲ ވިދާޅުވީ، މިހާރު ސްތްރަކްޗާ ނިމިފައި ވަނީ 1 ޓަވަރުގެ ކަމަށާއި 6 ޓަވަރެއް ސްޓަރަކްޗާގެ 10 ބުރި އެޅިފައި ވާ ކަމަށެވެ.
ކޮންމެ ފްލޯއެއްގައި 8 އެޕާޓްމަންޓް ހުންނަ ގޮތަށް ހަދާ މި ޓަވަރުތައް ހަދަނީ ރިއިންފޯސްޑް ކޮންކްރީޓް ބޭނުން ކޮށްގެންނެވެ.
227 މިލިއަން އެމެރިކާ ޑޮލަރުގެ މި ލޯން މަޝްރޫގެ ދަށުން ހަދާ ތަވަރުތަކުގައި 17-18 ބުރި ހުންނާނެއެވެ. އެއީ 650 އަކަފޫޓުގެ 2 ކޮޓަރި ހިމެނޭ 1200 ފްލެޓާއި 900 އަކަފޫޓުގެ 3 ކޮޓަރި ހިމެނޭ 2800 ފްލެޓެވެ.
މި ޓަވަރުތައް އާންމުނަށް ދޭނީ ފިނިޝިން ނިންމާފައި ކަމަށް އެފްޑީސީން ބުނެއެވެ.
