ރައްޔިތުންގެ މަޖިލީހުގެ މިއަދުގެ ޖަލްސާ ރިޔާސަތުން "ހުއްޓުވާފައިވާ" ކަމަށް ވިދާޅުވެ، އެމްޑީޕީގެ މަޖިލިސް މެންބަރުން ރިޔާސަތަށް ފާޑުވިދާޅުވެއްޖެއެވެ.
މިއަދު ނެރުނު ބަޔާނެއްގައި، ސަރުކާރު ހިންގާ މައި ޕާޓީގެ މެންބަރުންގެ ގްރޫޕުން ބުނީ، ރައްޔިތުންގެ މަޖިލީހުގައި އެހެން މައްސަލައަކަށް ބަހުސްކޮށް ގޮތެއް ނިންމޭނީ، މަޖިލީހުގެ ނައިބު ރައީސް އީވާ އަބްދުﷲ މަގާމުން ވަކިކުރުމުގެ މައްސަލައާ މެދު ގޮތެއް ނިންމުމަށް ފަހުގައި ކަމަށެވެ.
އެ ގްރޫޕުން ބުނި ގޮތުގައި، މިއަދުގެ ޖަލްސާ އަށް އެއްބާރުލުން ދިނީ ކޮމިޓީތައް އަލުން އެކުލަވާލުމުގެ މައްސަލަ އާއި މުހިންމު އެހެން މައްސަލަތައް ޖަލްސާގެ އެޖެންޑާކޮށްފައި އޮތުމުންނެވެ.
ނަމަވެސް އަލަށް އުފައްދާ "ދަ ޑިމޮކްރެޓްސް"ގެ މެދުހެންވޭރު ދާއިރާގެ މެންބަރު އަލީ އާޒިމާއި، އެ ޕާޓީ އަށް ނިސްބަތްވެވަޑައިގަންނަވާ ބައެއް މެންބަރުން ނިޒާމީ ނުކުތާ ނަންގަވައި ވިދާޅުވަމުން ގެންދެވީ، ކޮމިޓީތައް އެކުލަވާލުމަށް އެޖެންޑާ ކޮށްފައިވާ މައްސަލަ ސާފުނޫން ކަމަށާއި، ޖަލްސާ ކުރިއަށް ދަނީ ގަވައިދާ ހިލާފަށް ކަމަށެވެ. އެހެންވެ، އެ މައްސަލަ އެޖެންޑާ އިން ނަންގަވައި، ޖަލްސާ ކުރިއަށް ގެންދިއުމަށް އެ މެންބަރުން ގޮވާލައްވަމުން ގެންދެވިއެވެ.
މިއަދުގެ ޖަލްސާގައި ފާހަގަވެގެން ދިޔައީ މެންބަރުން ލަވާ ހަޅޭކާއި ގޮވަމުންދާ އައުގުރާނަ އާއި އެއް މެންބަރަކު އަނެއް މެންބަރަކަށް ކުރާ ތުހުމަތުތަކެވެ. ގަވައިދަށް ހުރުމަތްތެރިކޮށް ހިތުމަށް މެންބަރުންނަށް ގޮވާލެއްވުން ނޫން އިތުރު ކަމެއް، ރިޔާސަތު ބެލެހެއްޓެވި ވިލުފުށި ދާއިރާގެ މެންބަރު ހަސަން އަފީފް ނުކުރައްވައެވެ. އެހެންކަމުން، އެއްވެސް މައްސަލައަކަށް ބަހުސް ނުކުރެވި، ޖަލްސާގެ ނިޒާމް ގެއްލި، އެންމެ ފަހުން ޖެހުނީ ނިންމާލާށެވެ.
އެމްޑީޕީގެ މެންބަރުން ބުނީ، މިއަދުގެ ޖަލްސާ ހަލަބޮލިކުރުމަށް ރިޔާސަތުން ފުރުސަތުދީ، ޖަލްސާ ހުއްޓުވާފައިވާ ކަމަށެވެ. އަދި ރިޔާސަތުން އިދިކޮޅުގެ އަމަލުތަކަށް އެއްވެސް ފިޔަވަޅެއް ނާޅައި، ގަވައިދާ އެއްގޮތަށް އަމަލުކުރުމަށް ފަސްޖެހިފައިވާ ކަމަށް މެންބަރުން ފާހަގަކުރިއެވެ.
ކޮމިޓީތައް އަލުން އެކުލަވާލުމުގެ މައްސަލައިގެ އިތުރުން، މުހިންމު މަސައްކަތްތަކެއް ކުރުމަށް މިއަދުގެ ޖަލްސާގައި އެޖެންޑާކޮށްފައިވާ ކަމަށާއި، އެއިން ކަމަކަށް ވެސް ފުރުސަަތު ނުދީ ޖަލްސާ ހުއްޓާލުމުން ކަންބޮޑުވާ ކަމަށް ބުނެ، އެމްޑީޕީގެ މެންބަރުންގެ ގްރޫޕުން ވަނީ، މަޖިލީހުގައި މިހާރު ހުއްޓިފައިވާ މަސައްކަތްތައް ކުރިއަށް ގެންދެވޭނެ މަގު ފަހިކޮށްދިނުމަށް މެންބަރުންނަށާއި މަޖިލީހުގެ އިދާރާ އަށް އިލްތިމާސްކޮށްފައެވެ.
