ހދ.އަތޮޅުގެ އިސް މެޖިސްޓްރޭޓް އަލީ އާދަމަށް މަރުގެ އިންޒާރު ދިން މައްސަލައިގައި ދެ މީހަކު ހައްޔަރުކޮށްފިއެވެ.
'ދަ ޕްރެސް' އަށް މައުލޫމާތު ދެމުން ފުލުހުން ބުނީ މެޖިސްޓްރޭޓަކަށް މަރުގެ އިންޒާރު ދިން މައްސަލައާއި ގުޅިގެން މި މަހުގެ 22ވަނަ ދުވަހު ދެ މީހަކު ހައްޔަރުކޮށްފައިވާ ކަަމަށެވެ.
މި މައްސަލަ އާއި ގުޅިގެން ހައްޔަރުކޮށްފައިވަނީ 23 އަހަރު އަދި 25 އަހަރުގެ މީހެކެވެ. މައުލޫމާތު ލިބިފައިވާ ގޮތުން އަލީ އާދަމްއަށް އިންޒާރުދީފައި ވަނީ ރީޖަނަލް ހޮސްޕިޓަލުތެރޭގައި ހުންނަވަނިކޮށެވެ.
ފުލުހުން މި މައްސަލަ އިތުރު ތަހްގީގުކުރަމުން އަންނަ އިރު މިކަމާ ގުޅޭ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.
ފަހަކަށް އައިސް ކޯޓުތަކުގައި ހިނގާ މައްސަލަތަކާ ގުޅިގެންނާ އަދިވެސް އިތުރު ސަބަބުތަކާ ހެދި ފަނޑިޔާރުންނަށް އިންޒާރުދޭ މައްސަލަ ފެންމަތިވަމުން އަންނައިރު ބައެއް ފަހަރު މިފަދަ އަމަލުތައް ހިންގަނީ ހުކުމަށް ނުފޫޒު ފޯރުވުމަށް ކަމަށް ގިނަ ބަޔަކު ގަބޫލުކުރެއެވެ.
