ހދ. ކުޅުދުއްފުށީގައި 48 އަހަރުގެ ދިވެހި ފިރިހެނަކު މަރުވެފައި އޮއްވާ ފެނިއްޖެއެވެ.
ފުލުހުން ބުނީ، ކުޅުދުއްފުށީގައި މީހަކު ފާހަނައަށް ވަދެ ނުނިކުމެ ގިނައިރު ވެގެން ބެލި އިރު ފާހަނަ ތެރެއަށް ވެއްޓިފައި އޮތުމުން ކުޅުދުއްފުށި ރީޖަނަލް ހޮސްޕިޓަލަށް ގެންގޮސްފައިވާ ކަމަށް މިއަދު ހެނދުނު 10:30 ހާއިރު ފުލުހުންނަށް ރިޕޯޓު ކޮށްފައިވާ ކަމަށެވެ.
ކުޅުދުއްފުށި ރީޖަނަލް ހޮސްޕިޓަލަށް ގެންދިޔައިރުވެސް އެމީހާ މަރުވެފައިވާ ކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށް ފުލުހުން ބުނެއެވެ.
މި މައްސަލަ ތަހުގީގު ކުރަމުންދާ ކަމަށް ފުލުހުން ވަނީ ބުނެފައެވެ.
ކުޅުދުއްފުށީގައި ފާހަނައެއްގެ ތެރޭގައި މީހަކު މަރުވި މިހާދިސާ ސަމާލުކަމަށް އައިސްފައި ވާއިރު މިދިޔަ އެފްރީލް މަހުގެ ތެރޭގައި ނ. މަނަދޫ ގެއެއްގެ ތެރޭގައި އުމުރުން ދުވަސްވީ އަންހެނަކު މަރުވެފައި އޮއްވާ ވެސް ވަނީ ފެނިފައެވެ. ނަމަވެސް ފަހުން ފުލުހުން ވަނީ އެމީހާ އޮތީ މަރާލާފައި ކަމަށް ބުނެފައެވެ. "ދަ ޕްރެސް" އަށް އެނގިފައިވާ ގޮތުން މަރާލާފައި އޮއްވާ ފެނުނު ނައީމާ މޫސާގެ ހަށިގަނޑުގައި ޒަހަމް ހުރި އިރު ކަރުގައި ވަަޅިއަޅައި ބުރިކޮށްލަންވެސް މަސައްކަތް ކޮށްފައި ހުއްޓެވެ.
ނައީމާ މަރުގައި ތުހުމަތު ކުރެވޭ ކަންތައްތަކެއް ފާހަގަ ކުރެވިފައި ވާތީ މި މައްސަލައިގެ ތަހުގީގު ކުރިއަށް ގެންދަނީ ހޮމިސައިޑް އިންވެސްޓިގޭޝަނެއްގެ ގޮތުގައި ކަމަށް މީގެ ކުރިން ފުލުހުން ވަނީ ބުނެފައެވެ. ނަމަވެސް ޕޯސްޓްމޯޓަމް ހެދުމަކާ ނުލާ ނައީމާގެ ހަށިގަނޑު ވަނީ އެޕްރީލް މަހުގެ 08 ވަނަ ދުވަހު ވަޅުލާފައެވެ.
ނައީމާގެ މަރުގެ މައްސަލައިގައި ފުލުހުން ހިންގާ ތަހުގީގު ތެރެއިން އެރަށުގެ ގިނަ ބައެއްގެ ފިންގާ ޕްރިންޓާއި ޑީއެންއޭ ވަނީ ނަގާފައެވެ.
