ޗާގޯސް އަކީ ދިވެހިންގެ ތަނެއް ކަމަށް ބުނެ ބައެއް ފަރާތްތަކުން ވާހަކަ ދެއްކި ނަމަވެސް އެއްވެސް ލިޔެކިޔުމަކުން އެއީ ދިވެހިންގެ ތަނެއްކަން އެނގެން ނެތް ކަމަށް ރައީސް ވިދާޅުވެއްޖެއެވެ.

ރައީސް އޮފީހުގައި މިހާރު ކުރިއަށް ދާ ޕްރެސް ކޮންފަރެންސްގައި ރައީސުލްޖުމްހޫރިއްޔާ އިބްރާހިމް މުހަންމަދު ސޯލިހު ވިދާޅުވީ، ދިވެހިރާއްޖެ މިނިވަން ވީއްސުރެ އަދި އޭގެ ކުރިންވެސް އަދި ފަހުންވެސް، ޗާގޯސް އަކީ ރާއްޖޭގެ ތަނެއްކަން އެނގޭނެ އެއްވެސް ލިޔެކިޔުމެއް ނެތް ކަމަށެވެ. އަދި ރާއްޖެ މިނިވަން ވީއްސުރެ ނިމިދިޔަ 4 ވެރިކަމުގައިވެސް، ޗާގޯސް އަކީ ރާއްޖޭގެ ތަނެއް ކަމަށް ދެކިގެން ނުވަތަ ބަލައިގެން ރާއްޖޭގައި ވެސް އަދި ރާއްޖެއިން ބޭރުގައިވެސް ވަކާލާތެއްވެސް ކޮށްފައި ނުވާ ކަމަށާއި އެކަން އެގޮތަށް އޭރުވެސް ކޮށްފައި ނުވަނީ ޗާގޯސްގެ މައްޗަށް ރާއްޖޭގެ ސިޔާދަތީ ބާރު އޮތް ކަމަށް ނުދެކޭތީ ކަމަށް ގަބޫލު ކުރައްވާ ކަމަށެވެ.

އިތުރަށް ރައީސް ވިދާޅުވީ، މިއަދު ނިމިގެން ދިޔައީ، މީގެ ކުރިން [ރާއްޖެ މިނިވަން ވީއްސުރެ] ކަނޑައެޅިފައި ނުވާ އިމެއް ކަނޑައެޅިގެން ދިޔުން ކަމަށާއި، މީގެ ކުރިން ރާއްޖެއަށް ހައްގު އޮންނަ މިންވަރަކީ ދެކުނުން 12 މޭލުގެ ރާސްތާ ކަމަށާއި، ވަގަށް މަސްވެރިކަން ކޮށްގެން ފިލަން އުޅެކޮށް އަތުލެވޭ ބަޔަކު ހިފަހައްޓަށް އިތުރު 12 މޭލަށް ނިކުތުމުގެ ހުއްދަ ފިޔަވައި ދުރަށް ދިޔުމުގެ ހުއްދަ ބައިނަލްއަގުވާމީ ގާނޫނުތަކުން ނުލިބޭ ކަމަށެވެ.

އިތުރަށް ރައީސް ވިދާޅުވީ، ބައިނަލްއަގުވާމީ ގާނޫނުތަކުން ކޮންމެ ގައުމެއްގެ ވަށައިގެންވެސް 200 ނޯޓިކަލް މޭލު ލިބޭ ގޮތަށް އޮންނަ ނަމަވެސް ދެކުނުން އޮތީ އިމެއް ކަނޑަ ނޭޅި ކަމަށް ވާއިރު، އެ ދުރުމިނަށް [200 ނޯޓިކަލް މޭލަށް] ދިވެހި މަސްވެރިން ނުކުމެ އުޅުނުކަން އެމްއެންޑީއެފްގެ ރެކޯޑްތަކާ ހަވާލާ ދެއްވާ ނެތްކަމަށެވެ.

ރައީސް ވަނީ މިއަދު މޮރިޝަސް އަށް ފޮނުއްވި ސިޓީގެ ވާހަވެސް ވިދާޅުވެފައެވެ. ރައީސް ވިދާޅުވީ، ލީކްވެގެން ކަމަށް ބުނެ އާންމު ކުރަނީ ސިޓީ ނޫން ކަމަށާއި ސިޓީގައި އޮތް ވާހަކަ މިއަދު އިޓްލޮސް އިން ނިންމި މައްސަލައިގެ ހުކުމުގައި އެބައޮތް ކަމަށެވެ. އެ ހުކުމުގައި އޮތީ، ޗާގޯސް އަކީ މޮރިޝަސްގެ ތަނެއްގެ ގޮތުގައި އައިސީޖޭ އިން އދ އަށް ދިން އިޝްތިޝާރީ ލަފައާ އެއްގޮތަށް ބަލައިގަނެ އދ ގައި ރާއްޖެއިން ވޯޓު ދޭނެ ކަމަށާއި، ރާއްޖޭގެ ސަރަހައްދުގެ ތެރެއިން ދަތުރު ކުރަން ބޭނުންވާ މޮރިޝަސްގެ އުޅަނދު ފަހަރަށް އެހީތެރިކަން ފޯރުކޮށްދޭނެ ކަމަށެވެ.

މިއަދު އިޓްލޮސްގައި ނިމިދިޔަ މައްސަލައަކީ މޮރިޝަސް އަށް ޗާގޯސް ލިބުނު ފަހުން ޗާގޯސް އިން 200 މޭލު އަދި ރާއްޖެއިން 200 މޭލު ކުރަހައިފި ނަމަ އެ ދެމެދު ފުށޫ އަރާ އީއީޒެޑް ދެބަޔަށް އެއްވަރުވާނޭ ހަމައަކުން ބެހުމުގެ މައްސަލައެވެ. އެ މައްސަލައިގައި މިއަދު ނިމިގެން ދިޔަ ގޮތުން ރާއްޖެއަށް ވަނީ 47،232 އަކަ ކިލޯމީޓަރު، އަދި މޮރިޝަސް އަށް 45،331 އަކަ ކިލޯމީޓަރު ލިބިފައެވެ. އެއީ ރާއްޖެއަށް 135 ނޯޓިކަލް މޭލެވެ.

މި ނިންމުމާ ގުޅިގެން ރާއްޖެއަށް ކަނޑުގެ ބައެއް ގެއްލޭ ކަމަށް ބައެއް މީހުން ވާހަކަ ދައްކާ ސަބަބަކީ ރާއްޖެއިން ފެށިގެން 200 ނޯޓިކަލް މޭލު ލިބިފައި އޮންނަ ކަމަށް ބަލައިގެން ދައްކާ ވާހަކައެކެވެ.